ერთ-ერთი მოძრაობის აქტივისტებმა ლონდონის ეროვნულ გალერეაში ვან გოგის მზესუმზირებს პამიდვრის წვნიანი შეასხეს. ტილო, საბედნიეროდ, მინით იყო დაცული, თუმცა, აქტივისტების ქმედებას ადგილზე აღშფოთების შეძახილები მაინც მოჰყვა.

ნახატზე წვნიანის შესხმის შემდეგ, აქტივისტებმა კედელზე თავი "მიიწებეს". როგორც აღმოჩნდა, ისინი მოძრაობა Just Stop Oil-ს წარმოადგენდნენ. აღნიშნული ორგანიზაცია კლიმატის კრიზისის საკითხებზე ყურადღების გამახვილებას და ნავთობისა და გაზის მოხმარების შემცირებას მოითხოვს.

"რა უფრო მნიშვნელოვანია, ხელოვნება თუ სიცოცხლე?", — განაცხადა გალერეაში ერთ-ერთმა აქტივისტმა, — "საკვებზე მნიშვნელოვანია? სამართლიანობაზე მნიშვნელოვანია? ნახატის დაცვა უფრო გადარდებთ თუ ჩვენი პლანეტისა და ხალხის?".

ახალგაზრდებმა ასევე თქვეს, რომ "ცხოვრების გაძვირება ნავთობის გაძვირებით გამოწვეული კრიზისის ნაწილია. ნავთობი სიცივეში მცხოვრები მილიონობით მშიერი ოჯახისთვის ხელმიუწვდომელია. მათთვის წვნიანის ქილაც კი ხელმიუწვდომელია".

აქტივისტები დარბაზიდან მალევე გაიყვანეს.

ფოტო: Just Stop Oil / Twitter

მოძრაობა Just Stop Oil-ის აქტივისტები საპროტესტო ქმედებებს ბოლო დღეებში აქტიურად აწყობდნენ. მართალია, ზოგიერთისთვის მოტივი გასაგებია, მაგრამ გალერეაში ახალგაზრდების ქმედებამ გულისწყრომა მაინც გამოიწვია.

"შეიძლება ცდილობენ, ხალხი ამ პრობლემებზე დააფიქრონ, მაგრამ მხოლოდ მათი გაღიზიანება და გაბრაზება გამოსდით", — განაცხადა მუზეუმში მყოფმა ერთ-ერთმა პირმა.

"ადამიანს, რომელიც პლანეტის გლობალურ პრობლემებზე არ ფიქრობს, ეროვნულ გალერეაში ვერ შეხვდებით".

Just Stop Oil-ის წარმომადგენელი კი აცხადებს, რომ ისინი "ცვლილებას მოითხოვენ, ცვლილება კი, სამწუხაროდ, ასე ხდება".