თავდაცვის სამინისტროს ინფორმაციით, სამხედრო მოსამსახურე, ლაშა დვალიშვილი, რომელიც კორცხელში მომხდარ ინციდენტთან არის დაკავშირებული, შეიარაღებული ძალებიდან დაითხოვეს. გადაწყვეტილება ამის შესახებ თავდაცვის მინისტრმა, თინა ხიდაშელმა მიიღო და განმარტა, რომ არ დაუშვებს შეიარაღებული ძალებისთვის ჩრდილის მიყენებას და ღირსების შელახვას:

"ზუგდიდის რაიონის სოფელ კორცხელში მომხდარი ინციდენტის ამსახველი ვიდეომასალა, სამწუხაროდ, არ გვიტოვებს შესაძლებლობას, ვივარაუდოთ, რომ სამხედრო მოსამსახურის ქცევა თავსებადი იყო ჯარისკაცის დისციპლინის და ღირსეული საქციელის შეიარაღებულ ძალებში დამკვიდრებულ წესებთან. შესაბამისად, პირველი კლასის რიგითი ლაშა დვალიშვილი გენერალური შტაბის უფროსის ბრძანებით დათხოვნილია შეიარაღებული ძალებიდან".

ხიდაშელმა განმარტა, რომ თავდაცვის სამინისტრო არ არის უწყება, რომელიც მსგავს შემთხვევებში პირის ბრალეულობის საკითხს დაადგენს, შესაბამისი გადაწყვეტილებები ჯერ საგამოძიებო ორგანოების, შემდეგ კი სასამართლოს კომპეტენციაა. თუმცა, მისი თქმით, შეიარაღებულ ძალებს თავისი წესები, დისციპლინა და ნორმატიული ფუნდამენტი აქვს, რომელიც, პირველ რიგში, სამხედრო სამსახურში მტკიცე დისციპლინასა და განსაკუთრებით მაღალ სტანდარტებს ეფუძნება.

ლაშა დვალიშვილი საქართველოს შეიარაღებული ძალების III ქვეითი ბრიგადის 32-ე ქვეითი ბატალიონის პირველი კლასის რიგითი იყო.