ამის შესახებ ვლადიმერ პუტინის პრესსპიკერმა, დმიტრი პესკოვმა ჟურნალისტებთან საუბრისას განაცხადა.

რატომ არის მნიშვნელოვანი: კონტრშეტევის დაწყების შემდეგ უკრაინამ არაერთი ქალაქი და სოფელი გაათავისუფლა, როგორც სამხრეთის, ისე დასავლეთის მიმართულებით — რუსები უკან იხევენ და საბრძოლო ტექნიკას ტოვებენ.

  • უკრაინა კონტრშეტევას აგრძელებს და იბრუნებს მათ შორის იმ ოლქების დასახლებებს, რომლებიც რუსეთმა უკანონო ანექსიით "მიიერთა".
  • მაგალითად, დღეს სამხრეთის სარდლობამ ხერსონის ოლქში 8 დასახლება გაათავისუფლა.
  • მიუხედავად იმისა, რომ ხერსონი რუსეთს თავის ნაწილად აქვს გამოცხადებული, დღეს აღიარეს, რომ იქ "გადაჯგუფება" მოუწიათ — ამ ტერმინს ისინი მარცხის არაღიარებისთვის იყენებენ.

დეტალები: დმიტრი პესკოვთან შეხვედრისას ჟურნალისტებმა აღნიშნეს, რომ ვლადიმერ პუტინის თქმით, ეს ტერიტორიები სამუდამოდ რუსეთის ნაწილი გახდა, ამავდროულად კი ისმის ჯარების უკან დახევის შესახებ და იკითხეს, არის თუ არა აქ წინააღმდეგობა.

  • "აქ არაფერი ურთიერთგამომრიცხავი არ არის, ისინი სამუდამოდ რუსეთთან იქნებიან. მათ დაიბრუნებენ", — უპასუხა პესკოვმა, რაც იმას ნიშნავს, რომ კრემლი უკრაინის კონტრშეტევას უპასუხებს და ამ ტერიტორიების ხელახალ ოკუპაციას გეგმავს.

  • პესკოვს ასევე ჰკითხეს ხერსონისა და ზაპოროჟიეს რეგიონებზე და პუტინის ბრძანების ფორმულირებაზე მათი საზღვრების შესახებ, რადგან რუსეთმა არც კი იცის, რა საზღვრებით "მიიერთა" ეს ადგილები.

  • "ეს ეხება ტერიტორიას, რომელშიც სამხედრო-სამოქალაქო ადმინისტრაცია მოქმედებდა მიღების დროს... მაგრამ კიდევ ერთხელ ვიმეორებ, გარკვეული ტერიტორიები დაბრუნდება. და ჩვენ გავაგრძელებთ კონსულტაციებს იმ მოსახლეობასთან, რომელიც გამოთქვამს რუსეთთან ცხოვრების სურვილს", — უთხრა მათ პესკოვმა.

უკრაინაში ამბობენ, რომ ნებისმიერი რუსული ობიექტი ოკუპირებულ ტერიტორიებზე — უკრაინის შეიარაღებული ძალებისთვის ლეგიტიმური სამხედრო სამიზნეებია

  • ზელენსკიმ უკრაინის ოკუპირებული ტერიტორიების შესახებ პუტინის განკარგულებები ბათილად ცნო და განაცხადა, რომ უკრაინა თავისას უკან დაიბრუნებს.
  • და ოფიციალურად თქვა უარი ვლადიმერ პუტინთან მოლაპარაკებებზე.
  • ასევე, დაამტკიცა და წარადგინა NATO-ში დაჩქარებული წესით გაწევრიანების შესახებ განაცხადი.