ბრაზილიელი წყვილის ვიდეო, რომელშიც ჩანდა, რომ წვეულების დროს ჩანჩქერი ცისფრად შეღებეს, ინტერნეტში ვირუსულად გავრცელდა. ამის მიზეზი ბავშვის სქესის დადგენის ცერემონია იყო, ჩანჩქერის შეღებვით კი სტუმრებმა გაიგეს, რომ წყვილი ბიჭს ელოდება.

მართალია, წყვილმა ვიდეო მალევე წაშალა, თუმცა სოციალური ქსელების მომხმარებლებმა ჩანაწერი სხვადასხვა პლატფორმაზე გაავრცელეს და მომავალი მშობლებიც გააკრიტიკეს.

"ნამცხვრის დაჭრას რა დაუწუნეს?", — ვკითხულობთ Reddit-ზე განთავსებული ვიდეოს კომენტარებში. "რატომ უნდა ზიანდებოდეს ბუნება იმის გამო, რომ ამ ადამიანებს თავი განსაკუთრებულები ჰგონიათ?" — ასე აკრიტიკებენ წყვილს სოციალური ქსელების მომხმარებლები.

ადგილობრივი შტატის გარემოს დაცვის სამსახურის წარმომადგენელმა ინციდენტის შესახებ განცხადება გაავრცელა. განცხადებაში ნათქვამია, რომ გამოძიება უკვე დაიწყო იმის დასადგენად, თუ რა ნივთიერებები გამოიყენეს ჩანჩქერის შესაღებად და რა ტიპის ზიანი მიაყენეს გარემოს.

ეს პირველი შემთხვევა არ არის, როცა სქესის გამოვლენის ცერემონიაზე შეკრებილები ჩანჩქერებს ღებავენ, მსგავსი ვიდეოები TikTok-სა და სხვა სოციალურ ქსელებში საკმაოდ დიდი რაოდენობით ვრცელდება. 2020 წელს ერთ-ერთ ასეთ წვეულებაზე პიროტექნიკის გამოყენებამ ხანძარი გამოიწვია, შედეგად 93 კვ.კმ-ის ფართობის ტყე და 20 შენობა დაიწვა, ერთი მეხანძრე კი გარდაიცვალა.

ფოტო: San Bernardino National Forest