კრივის ფედერაციის პრეზიდენტი, დავით წიკლაური კულტურის მინისტრის, თეა წულუკიანის განცხადებას ეხმაურება.

რატომ არის მნიშვნელოვანი: წულუკიანმა გუშინ, 28 სექტემბერს თქვა, რომ მისკენ დასარტყმელად კრივის ფედერაციის ხელმძღვანელმა გაიწია.

• მისი თქმით, როცა ამ პირმა დასარტყმელად გაიწია, ერთ-ერთი მწვრთნელი და მოადგილე გადაეფარა.
• "მისი ეს გამოქანება დასარტყმელად მოჰყვა იმას, რომ ის ითხოვდა ფულს და როცა მიიღო პასუხი, რომ ეს შეუძლებელია ახლა, მოდი ვიმუშაოთ, გამოგზავნეთ რა გაქვთ საჭიროებები და ვიმსჯელებთ, მან გააგრძელა შეურაცხყოფა ჩემი მოადგილის, შემდეგ..." — განაცხადა მინისტრმა
• მანამდე, 22 სექტემბერს პარლამენტში ისაუბრა, რომ მას, როგორც ქალ მინისტრს, სპორტის ფედერაციებთან ქალთა უფლების კუთხით ბევრი პრობლემა აქვს.

წიკლაური ბრალდებებს აბსურდულს და ცილისმწამებლურს უწოდებს, ასევე ამბობს, რომ ამ შურისძიების ობიექტია.

• წერს, რომ კრივის ისტორიაში "უპრეცედენტო გამარჯვების მოპოვების შემდეგ", სამინისტროში დაიბარეს და აცხადებს, რომ ეგონა მიულოცავდნენ;
• "სინამდვილეში კი რასაც ჰქვია გამოგვყარა მინისტრმა შენობიდან. მეტიც, არც მსურს გავიმეორო რა სიტყვები გვაკადრა და ეს მხოლოდ ჩვენს უწყინარ თხოვნაზე ფედერაციისთვის კუთვნილი ფინანსები გადმოერიცხათ, რომელიც მისი ბრძანებით ჯერ გაგვინახევრეს, მერე სულ გაგვინულეს", — ამტკიცებს წიკლაური;
• კრივის ფედერაციის პრეზიდენტი ამბობს იმასაც, რომ მინისტრისგან მიიღო ულტიმატუმი დაეტოვებინა თანამდებობა, რასაც არ დათანხმდა;
• "აკი შემომითვალეს რომ ჯობდა წავსულიყავი ჩემი ნებით, რომ "ჩემს უკან ოჯახი დგას" ეს ფრაზა განცხადებაში ღიადაც კი თქვა ქალბატონმა მინისტრმა".

გარდა ამისა, წიკლაური ამბობს, რომ მისი აზრით, მინისტრი "მასზე არ გაჩერდება".

• "ყველას ერთიანობა და თანადგომა დღეს როგორც არასდროს ისე ჭირდება სპორტს, კულტურას და ახალგაზრდობას. ყველაფერს იმას რისი მინისტრიცაა და რასაც წარმოადგენს ეს ქალბატონი ეს ყველაფერი სწორედ მისგანაა გადასარჩენი და თან სასწრაფოდ".

არქივიდან: ქალმა დეპუტატებმა, ხათუნა სამნიძემ, თამუნა კორძაიამ, ანა ბუჩუკურმა და თეონა აქუბარდიამ წულუკიანს მხარდაჭერა გამოუცხადეს.

• დეპუტატებმა განაცხადეს, რომ არ შეიძლება ქალი მინისტრი იმ მდგომარეობაში იყოს, რომ მას ფიზიკურ შეხლამდე უწევდეს საკუთარი ფუნქციების განხორციელება და კაცებთან ურთიერთობა;
• ასევე, აღნიშნეს, რომ ნებისმიერი ქალი, რომელიც პოლიტიკაშია, უთანასწორობას განიცდის, ამიტომ, პოლიტიკური კუთვნილების მიუხედავად, მათ მიმართ სოლიდარულები იქნებიან;
• დეპუტატები ამბობენ, რომ ამ საკითხით, როგორც კაცი დეპუტატები, ასევე, უფლებადამცველები და გენდერული საბჭო უნდა დაინტერესდეს.