ამის შესახებ ომის შემსწავლელი ინსტიტუტი ბოლო ანგარიშში წერს.

რატომ არის მნიშვნელოვანი: 29 აგვისტოს უკრაინა კონტრშეტევაზე გადავიდა და ამ დროისთვის უკვე აქვს გარკვეული წარმატება, როგორც სამხრეთში ასევე აღმოსავლეთით.

  • ომის შემსწავლელი ინსტიტუტის განცხადებით, უკრაინის შეტევაზე გადასვლამ ომის მიმდინარეობა შეცვალა, თუმცა ბრძოლები 2023 წლამდე გაგრძელდება;
  • შეტევითი ოპერაციის დაწყებიდან დღემდე უკრაინელებმა ფრონტის ხაზის 12 კილომეტრით გადაადგილება მოახერხეს;
  • მათივე თქმით, ფრონტის ხაზის სტაბილიზაციის შემდეგ, უკრაინის ჯარს ახალი შეტევების დაწყება მოუწევს.

დეტალები: ISW რუს სამხედრო ბლოგერებზე დაყრდნობით წერს, რომ უკრაინელ სამხედროებს წინსვლა აქვთ ლიმანის დასავლეთით, ჩრდილოეთითა და ჩრდილო-აღმოსავლეთით.

  • მათი თქმით, ლიმანში წინსვლა დონეცკის ჩრდილოეთითა და ლუგანსკის დასავლეთით რუსი სამხედროებით გადაჯგუფებაზე იმოქმედებს;
  • ამასთან, ამან, შესაძლოა, საშუალებას მისცეს უკრაინას, რომ ლუგანსკის ოლქის დასავლეთით, ასევე, სევეროდონეცკისა და ლისიჩანსკის ტერიტორიაზე ოკუპანტების პოზიციებს შეუქმნას საფრთხე.

ISW მიუთითებს, რომ რუსეთის ხელმძღვანელობა შესაბამის საინფორმაციო სივრცეს არ ქმნის ფრონტის ხაზზე მათი დანაკარგების შესახებ.

  • როგორც ომის შემსწავლელი ინსტიტუტი წერს, თავდაცვის სამინისტროს ლიმანში მათი წარუმატებლობის შესახებ განცხადება ჯერ არ გაუკეთებია და არც ამ ტერიტორიაზე მარცხისთვის მომზადებულა;
  • ISW-ის თქმით, ეს რუსი სამხედროების უკვე დაბალ საბრძოლო სულისკვეთებას, კიდევ უფრო შეასუსტებს;
  • ანგარიშში საუბარია მობილიზაციაზეც და აღნიშნულია, რომ რუსეთის ხელისუფლება ახლად მობილიზებულ და არასაკმარისად მომზადებულ მოქალაქეებს პირდაპირ ფრონტის ხაზზე გზავნის.