განსაკუთრებით დიდი ოდენობით ნარკოტიკული საშუალების უკანონო შეძენა-შენახვის და უკანონო გასაღების მცდელობის ბრალდებით, თბილისში, რუსეთის ორი მოქალაქე დააკავეს.

გამოძიების მტკიცებით, ბრალდებულები შეკვეთებს ინტერნეტსაიტის მეშვეობით იღებდნენ და ნარკოტიკებს თბილისის სხვადასხვა უბანში, კონკრეტულ მისამართებზე ტოვებდნენ.

შსს-ს ცნობით, სამართალდამცველებმა, დაკავებულების პირადი ჩხრეკისას, სარეალიზაციოდ გამზადებული, 333,15 გრამი ახალი ფსიქოაქტიური ნივთიერება - ბიო; 2 შეკვრად დაფასოებული ამფეტამინი; MDMA-ის შემცველი 177 აბი და ორი ნატეხი ამოიღეს. რაც შეეხება ბინისა და ავტომანქანის ჩხრეკას, პოლიციის მტკიცებით, აქ ამოღებულია ერთი კილო და 540,25 გრამი ბიო; 887,74 გრამი ამფეტამინის შემცველი ფხვნილი; MDMA-ის შემცველი 91 აბი და 29 ნატეხი. ასევე, თბილისში, სხვადასხვა მისამართიდან ამოღებულია სარეალიზაციოდ გამზადებული 22 შეკვრა ბიო.

შინაგან საქმეთა სამინისტროს ცნობით, ორივე დაკავებული ჩადენილ დანაშაულს აღიარებს.

გამოძიება განსაკუთრებით დიდი ოდენობით ნარკოტიკული საშუალების და ახალი ფსიქოაქტიური ნივთიერების უკანონო შეძენა-შენახვის და გასაღების მცდელობის ფაქტზე მიმდინარეობს (საქართველოს სსკ-ს 260-ე მუხლის მე-2 ნაწილით, მე-6 ნაწილის "ა" ქვეპუნქტით და 19-260-ე მუხლის მე-5 ნაწილის "ბ" ქვეპუნქტით).