უკრაინის პრეზიდენტის, ვოლოდიმირ ზელენსკის განცხადებით, იზიუმში მასობრივ სამარხზე 400-ზე მეტი ცხედარი იპოვეს. აღნიშნავს, რომ მსოფლიომ უნდა ნახოს რა დატოვა რუსეთის არმიამ

რატომ არის მნიშვნელოვანი: სამარხში იპოვეს სამოქალაქო პირების, მათ შორის ბავშვების და სამხედროების ცხედრები.

  • ზელენსკი აღნიშნავს, რომ მსოფლიომ უნდა იმოქმედოს და რუსეთი ოფიციალურად უნდა იყოს აღიარებული, როგორც ტერორისტული სახელმწიფო;
  • პრეზიდენტი ამბობს, რომ ოკუპანტები ვერ გაიქცევიან და ვერ დაიმალებიან — "შურისძიება სამართლიანად საშინელი იქნება. ყოველი უკრაინელისთვის, ყოველი წამებული სულისთვის";
  • "რუსეთი მხოლოდ სიკვდილს და ტანჯვას ტოვებს".

დეტალები: უკვე ცნობილია, რომ გაერო ჯგუფს გაგზავნის იზიუმის მასობრივი სამარხის შესასწავლად.

  • დამკვირვებლების მიზანია ადგილზე ჩასვლა, "რათა მეტი რამ გაირკვეს იმის შესახებ, თუ რა შეიძლებოდა იქ მომხდარიყო".

საერთაშორისო გამოხმაურებები: ესტონეთის პრემიერმინისტრი ამბობს, რომ იზიუმი არის რუსული ოკუპაციის სახე: "ქალაქები გადაიქცა მასობრივ სასაფლაოდ".

  • "ჯერ ბუჩა იყო, მერე მარიუპოლი და ირპენი... ახლა იზიუმი. ომის დამნაშავეები, რომლებიც პასუხისმგებელნი არიან ამ სასტიკ ქმედებებზე, უნდა დაისაჯონ", — წერს ევროპარლამენტის პრეზიდენტი რობერტა მეცოლა.
  • "ოკუპანტებს მიაქვთ უბედურებას და სიკვდილს, სადაც არ უნდა მივიდნენ. ჩვენ უნდა დავეხმაროთ უკრაინას ყველა საჭირო საშუალებით! ჩვენ უნდა შევაჩეროთ მშვიდობიანი მოსახლეობის მკვლელობა და ომი", — აცხადებს გიტანას ნაუსედა.