იტალიის მთავრობის გადაწყვეტილებით, ვინც კუნძულ სარდინიაზე ცხოვრებას გადაწყვეტს, მათ ქვეყნის ბიუჯეტიდან 15 ათას ევროს გამოუყოფენ. მნიშვნელოვანია ის ფაქტორი, რომ სარდინიაზე დასახლების მსურველებს თანხის უკან დაბრუნება არ მოეთხოვებათ. გამოყოფილი თანხით კი კუნძულზე სახლის შეძენა და საკუთარი ბიზნესის წამოწყება შეეძლებათ.

მთავრობის ინიციატივის მიზანია, რომ სარდინიის სოფლებსა და მცირე ზომის ქალაქები რაც შეიძლება მეტი ადამიანი მიიზიდოს. ამ კონკრეტული პროექტისთვის მთავრობამ 45 მილიონი ევრო გამოყო. ბოლო პერიოდში სარდინიის სოფლებიდან ახალგაზრდების დიდი ნაწილი დიდ ქალაქებში გადადის სამუშაოდ, რაც ამ ადგილების დაცარიელებას იწვევს. მთავრობა კი ცდილობს, რომ ახალი ინიციატივის ფარგლებში ადამიანებს სარდინიაში ცხოვრებისა და მცირე ბიზნესის დაწყების მოტივაცია მისცეს.

ფოტო: Pinterest

სარდინია იტალიის ავტონომიური რეგიონი და ხმელთაშუა ზღვის სიდიდით მე-2 კუნძულია, რომელიც ლამაზი სანაპიროებით გამოირჩევა. მათ შორისაა ცნობილი ზურმუხტოვანი სანაპირო, რომელსაც ყოველწლიურად უამრავი ტურისტი სტუმრობს. რაც შეეხება კლიმატს, კუნძულზე წელიწადის განმავლობაში 300 დღე მზიანია, რაც სარდინიას სანაპიროზე დასვენების მოყვარულებისთვის საკმაოდ მიმზიდველ ადგილად აქცევს.

15000 ევროს მიღების მთავარი პირობაა, რომ მსურველი სარდინიის მუნიციპალიტეტში დასახლდეს, სადაც 3000-ზე ნაკლები მოსახლე ცხოვრობს. გამომდინარე იქიდან, რომ ინიციატივისთვის 45 მილიონი ევროა გამოყოფილი, სარდინიის მთავრობა იმედოვნებს, რომ კუნძულზე მოსახლეობის რაოდენობა გარკვეული პერიოდის შემდეგ საგრძნობლად გაიზრდება.