"როგორც ვხედავთ, ოფიციალური თბილისი განაგრძობს სისტემატურ პროვოკაციებს, რომლებიც რუსეთთან ურთიერთობის გაჯანსაღებას საფრთხეს უქმნის," - ეს განცხადება რუსეთის საგარეო საქმეთა სამინისტრომ მოსკოვის ყოფილი მერის თბილისში ვიზიტთან დაკავშირებით გააკეთა.

განცხადებაში წერია, რომ ლუჟკოვის შავ სიაში შეყვანას რაციონალური ახსნა არ აქვს, რადგან რუსეთ-საქართველოს ურთიერთობების ნორმალიზაცია საქართველოს ეკონომიკისა და მოქალაქეებისთვის მოაქვს სარგებელი.

რუსეთის საგარეო საქმეთა სამინისტრო მოუწოდებს მოსახლეობას ყურადღებით შეაფასონ "რისკები", რომლებიც საქართველოში გამგზავრებას უკავშირდება:

"გასაგებ მიზეზთა გამო, ადგილობრივმა ხელისუფლებამ იური ლუჟკოვს სანქციები მხოლოდ მას შემდეგ დააკისრა, რაც მან "სტუმართმოყვარე საქართველო" დატოვა. ამასთან, ბოლო წლებში, სამწუხაროდ, იყო სხვა შემთხვევებიც."

მოსკოვის ყოფილი მერი იური ლუჟკოვი საქართველოში ოთხი დღის განმავლობაში იმყოფებოდა. ლუჟკოვს დარღვეული აქვს საქართველოს კანონი ოკუპაციის შესახებ და ის საქართველოს ოკუპირებულ რეგიონებში რუსეთის მხრიდანაა ნამყოფი, თუმცა მან საზღვარი უპრობლემოდ გადმოკვეთა. შს მინისტრის მოადგილის, შალვა ხუციშვილის თქმით, იური ლუჟკოვი ე.წ. შავ სიაში იქნება შეყვანილი და ის საქართველოში ვეღარ შემოვა.

თავად იური ლუჟკოვი თავს თბილისის საპატიო მოქალაქედ მიიჩნევს და სექტემბერში, მეგობრის შვილიშვილის ქორწილში ჩამოსვლასაც გეგმავს.