იემენის დედაქალაქ სანაში საგანგებო მდგომარეობა გამოცხადდა, მას შემდეგ, რაც ქვეყანაში ქოლერა მოულოდნელად გავრცელდა.

Reuters-ის ინფორმაციით, დაავადებამ დედაქალაქში 27 აპრილიდან 13 მაისამდე 115 ადამიანი მოკლა. ქალაქის ის რამდენიმე საავადმყოფო, რომელიც ფუნქციონირებას განაგრძობს, ქოლერით დაავადებული ადამიანებითაა სავსე.

იემენში სამოქალაქო ომთან ერთად, შიმშილი და სიღარიბე მძვინვარებს, რაც დაავადების სწრაფად გავრცელებას უწყობს ხელს. გაეროს მონაცემების მიხედვით, მოსახლეობის ორ მესამედს სუფთა წყალზე წვდომა არ აქვს.

წითელი ჯვრის ინფორმაციით, ქვეყნის მასშტაბით ქოლერით დაავადებული ადამიანების რიცხვი ბოლო კვირას გასამმაგდა და 8 500-ს გადააჭარბა.