მხევლის წიგნის მე-5 სეზონის პირველი ტრეილერი უკვე გამოვიდა და საკმაოდ დაძაბულ სანახაობას გვპირდება. როგორც ტრეილერიდან ჩანს, ამ სეზონის მთავარი გმირები ჯუნი და სერენა იქნებიან და ერთმანეთის დასამარცხებლად ნებისმიერ გზას გამოიყენებენ.

"მინდა იცოდეს, რომ ეს მე ჩავიდინე", — როგორც ჩანს, ჯუნი მეოთხე სეზონის ფინალს საერთოდ არ ნანობს და იმედი აქვს, ამით სერენას გაამწარებს. ამასობაში სერენა, რომელიც მწუხარე ქვრივის როლს კარგად თამაშობს, ეშმაკურად იღიმის.

ტრეილერში იმასაც ვხედავთ, რომ გილიადში მიმდინარე ბრძოლა თანდათანობით კანადაშიც იკვლევს გზას. ერთ-ერთ კადრში ჯუნი გისოსებს მიღმაა, ტრეილერის ბოლოს კი სერენას წინ მდგარს ხელი იარაღისკენ მიაქვს.

ემის მფლობელი სერიალი მარგარეტ ეტვუდის ამავე სახელწოდების მქონე დისტოპიური ნოველის მიხედვითაა გადაღებული. მაყურებლებმა მხევლის წიგნი პირველად 2017 წელს იხილეს და ის უამრავი ადამიანის საყვარელ სერიალად იქცა.

მხევლის წიგნის მე-5 სეზონის პირველი ორი სერია 14 სექტემბერს გამოვა.