კანონპროექტის ინიციატორები აშშ-ს სენატში საგარეო ურთიერთობათა კომიტეტის ევროპისა და რეგიონული უსაფრთხოების საკითხებში თანამშრომლობის ქვეკომიტეტის თავმჯდომარე სენატორი, ჯინ შაჰინი და რესპუბლიკელი მიტ რომნი არიან.

რატომ არის მნიშვნელოვანი: კანონპროექტი აშშ-ის პრეზიდენტს შავი ზღვის რეგიონში უფრო ძლიერი საგარეო პოლიტიკის გატარებისკენ მოუწოდებს.

  • კერძოდ გულისხმობს შავი ზღვის ქვეყნებთან ეკონომიკური კავშირების გამყარებას, დემოკრატიული ინსტიტუციების გაძლიერებასა და აშშ-ს, NATO-სა და პარტნიორებს შორის სამხედრო დახმარებისა და კოორდინაციის გაზრდას.

ჯინ შაჰინის თქმით, რადგან პუტინი აგრძელებს ომს უკრაინაში, აშშ მზად უნდა იყოს გამოწვევებისთვის.

  • "პუტინმა უკვე აჩვენა რამდენად მაღალ სტრატეგიულ ღირებულებას ანიჭებს შავი ზღვის რეგიონს 2008 წელს საქართველოში შეჭრით, რასაც მოჰყვა ყირიმის ანექსია 2014 წელს და შემდგომი შეჭრა უკრაინაში ამ წელს".

მიტ რომნის თქმით, რეგიონი სულ უფრო კრიტიკული ხდება, რადგან პუტინი აგრძელებს თავის არაპროვოცირებულ ომს უკრაინაში და ცხადი გახდა, რომ აშშ-ს უნდა ჰქონდეს როგორც სტრატეგია, ასევე წარმომადგენლობა შავ ზღვაში.