რვა არასამთავრობო ორგანიზაცია მიიჩნევს, რომ სახელმწიფო აუდიტის სამსახურის ხელმძღვანელის, ლაშა თორდიას მიმართ ძალადობას, სავარაუდოდ ამ ორგანოს საქმიანობასთან კავშირში, არ შეიძლება ჰქონდეს რიგითი ცემის კვალიფიკაცია. ლაშა თორდია თავდასხმას თავისი სამსახურის მიერ ყოფილი მთავარი პროკურორის, ოთარ ფარცხალაძის შესახებ მასალების მოგროვებას უკავშირებს.

"იმის გათვალისწინებით, რომ საქმე ეხება კონსტიტუციური ორგანოს ხელმძღვანელზე თავდასხმას და მასში სავარაუდოდ ფიგურირებს ყოფილი მთავარი პროკურორი ოთარ ფარცხალაძე, რომლის არაფორმალურ გავლენებზეც სამართალდამცავ უწყებებში საზოგადოებაში არსებობს კითხვები, მნიშვნელოვანია, საქმის შესწავლა განახორციელოს საქართველოს პარლამენტის საგამოძიებო კომისიამ. სხვა შემთხვევაში მიმდინარე გამოძიებას არ ექნება სანდოობა საზოგადოების თვალში," - აღნიშნავენ ხელმომწერი ორგანიზაციები.

მათ მიაჩნიათ, რომ ბოლო დროს სამართალდამცავების შესაძლო მონაწილეობით ძალადობის საქმეების დაუსრულებელი გამოძიების გამო დაუსჯებლობა, საჯარო სივრცეში ძალადობრივი ფაქტების გავრცელებას ხელს უწყობს და დაუცველობის განცდას აჩენს.

"ასეთი ფაქტები და მათზე არაეფექტური რეაგირების ტენდენცია კიდევ ერთხელ აყენებს დღის წესრიგში დამოუკიდებელი საგამოძიებო მექანიზმის დროულად შექმნის საჭიროებას, რომელიც გამოძიებეს საქმეებს, სადაც სამართალდამცავი ორგანოების მონაწილეობა შეიძლება იკვეთებოდეს," - დასძენენ ორგანიზაციები.

არასამთავრობო ორგანიზაციები შემდეგი სახის მოწოდებებს ავრცელებენ:

  • საგამოძიებო ორგანოებმა დროულად გაასაჯაროვონ ინფორმაცია ამ დრომდე განხორციელებული საგამოძიებო მოქმედებების შესახებ;
  • საქართველოს პარლამენტმა შექმნას დროებითი საგამოძიებო კომისია საქმის დროული და მიუკერძოებელი გამოძიების მიზნით;
  • საქართველოს მთავრობამ და პარლამენტმა დროულად გადადგას ნაბიჯები დაუსჯელობის პრობლემასთან საბრძოლველად და შეიქმნას ეფექტიანი დამოუკიდებელი საგამოძიებო მექანიზმი.

ხელმომწერი არასამთავრობო ორგანიზაციები არიან:

  • საერთაშორისო გამჭვირვალობა - საქართველო;
  • ადამიანის უფლებების სწავლებისა და მონიტორინგის ცენტრი;
  • საქართველოს ახალგაზრდა იურისტთა ასოციაცია;
  • ინფორმაციის თავისუფლების განვითარების ინსტიტუტი;
  • სამართლიანი არჩევნებისა და დემოკრატიის საერთაშორისო საზოგადოება;
  • პარტნიორობა ადამიანის უფლებებისთვის;
  • კონსტიტუციის 42- მუხლი;
  • სიდა.