დუა ლიპა, კიმი, ნიკოლი — ნახეთ დემნას ახალი ჩვენება ვარსკვლავების მონაწილეობით

6 ივლისს პარიზში ბალენსიაგას მაღალი მოდის, ე.წ. Haute couture-ს ახალი კოლექციის ჩვენება გაიმართა და ამ ცნობილი მოდის სახლის ქართველი შემოქმედებითი ხელმძღვანელი, დემნა გვასალია კვლავ მოდის სამყაროს ყურადღების ცენტრში მოექცა.

შეგახსენებთ, რომ გასულ წელს დემნა გვასალიამ ბალენსიაგაში მაღალი მოდა 53 წლის შემდეგ ახალი ჩვენებით დააბრუნა. ამ მოვლენიდან ერთი წლის შემდეგ კი მაღალი მოდის ახალი კოლექცია ისევ წარუდგინა საზოგადოებას.

აღსანიშნავია, რომ არ შეცვლილა ჩვენების ადგილი — სალონი, რომელსაც ლეგენდარული კრისტობალ ბალენსიაგა იყენებდა. დემნამ ეს სივრცე გასული წლის ჩვენებისთვის აღადგინა და 60-იანი წლების ატმოსფერო შეუნარჩუნა.

დემნა გვასალიამ უკვე მოახერხა, რომ მოდის სამყაროში თავისი უნიკალური ხედვით გამორჩეული ადგილი დაეკავებინა და გამონაკლისი არც ეს ჩვენება იყო: ის ერთდროულად ეძებს ახალ ესთეტიკას, ამავდროულად კი არ ივიწყებს მოდის ისტორიას.

კლასიკურ სილუეტებთან ერთად ბალენსიაგას მაღალი მოდის ჩვენებაზე ნახავთ ჯინსებს, კომბინეზონებსა და ჰუდებს, რაც მსგავსი ტიპის კოლექციისთვის, როგორც წესი, უჩვეულო და "შეუფერებელია" ხოლმე.

თუ მაისში ნიუ-იორკის საფონდო ბირჟაზე გამართულ ჩვენებაზე დემნამ მოდელების სხეულები ლატექსით დაფარა, ამჯერად ისინი რეზინის კოსტიუმებში გამოაწყო.

სამოსის უჩვეულო მატერიასთან ერთად მოდელებს ეცვათ დიდი ზომის ფეხსაცმელები, საყურეებად საათები ეკეთათ და ხშირ შემთხვევაში მათ სახეებს შავი ჩაფხუტები ფარავდა.

ცხადია, ჩვენებას არაერთი ცნობილი ადამიანი ესწრებოდა, მათ შორის შენიშნავდით კრის ჯენერს, ანა ვინტურსა თუ ალექსა დემის, მაგრამ კაშკაშა ვარსკვლავები მხოლოდ მაყურებელთა რიგებში როდი იყვნენ.

ბალენსიაგას მაღალი მოდის ახალი კოლექციის წარდგენის ბოლო ნაწილში ისეთი ცნობილი სახეებიც გამოჩნდნენ, როგორებიც ნიკოლ კიდმანი, ნაომი კემპებილი, დუა ლიპა, ბელა ჰადიდი და კიმ კარდაშიანი არიან.