საპროცედურო საკითხთა და წესების კომიტეტში წარდგენილი იყო განაცხადი, რომლითაც მოძალადეები ითხოვდნენ, რომ არანაკლებ 25 000 ამომრჩევლის ინიციატივით, კანონპროექტის წარდგენის უფლება ჰქონოდათ. სწორედ ამის გამო სჭირდებოდათ საინიციატივო ჯგუფის რეგისტრაცია.

რატომ არის მნიშვნელოვანი: კომიტეტმა ჰომოფობიური ალტ-ინფოს წევრებისგან შემდგარი საინიციატივო ჯგუფი მხოლოდ პროცედურული ხარვეზის გამო არ დაარეგისტრირა.

  • საინიციატივო ჯგუფის მიერ წარმოდგენილი კანონპროექტი ჰომოფობიურია, ითვალისწინებს LGBTQ თემის წევრებისთვის შეკრების და მანიფესტაციის კონსტიტუციური უფლების შეზღუდვას.
  • პროექტში რომელიმე რელიგიური მიმდინარეობის საწინააღმდეგო აქციების გამართვის აკრძალვაზეცაა საუბარი.
  • გათვალისწინებულია ისეთი შეკრების ჩატარების აკრძალვაც, რომელზეც, შესაძლოა, ადგილი ჰქონდეს "ომის და ძალადობის პროპაგანდას, ეროვნული, კუთხური, რელიგიური ან სოციალური შუღლის გაღვივებას".

დეტალები: საინიციატივო ჯგუფში არიან — გიორგი ქარდავა, ზურაბ მახარაძე, ირაკლი მორგოშია, შოთა მარტინენკო, კონსტანტინე მორგოშია.

  • კანონპროექტები ითვალისწინებს ცვლილებებს სამ კანონში, მათ შორის — შეკრებებისა და მანიფესტაციების შესახებ კანონში, ადმინისტრაციულ სამართალდარღვევათა კოდექსში და სისხლის სამართლის კოდექსში.
  • კომიტეტის თავმჯდომარემ, ირაკლი ქადაგიშვილმა თქვა, რომ დარღვეულია კანონის მოთხოვნები.
  • თითოეულ საკანონმდებლო ცვლილებას თავისი განმარტებითი ბარათი უნდა ჰქონდეს, საინიციატივო ჯგუფს კი პაკეტის სახით წარმოდგენილ სამ კანონპროექტზე ერთი განმართებითი ბარათი აქვთ.

რას ფიქრობს ოპოზიცია: ენმ-ს დეპუტატმა, ლევან ბეჟაშვილმა კომიტეტზე თქვა, რომ პარლამენტმა უნდა იმსჯელოს კანონპროექტის შინაარსზე და მის კონსტიტუციასთან შესაბამისობაზე.

  • თამარ კორძაიას განცხადებით კი, კანონპროექტი არაფრად აგდებს საქართველოს კონსტიტუციას და მისწრაფებას, საქართველო იყოს მეტად დემოკრატიული და ადამიანის უფლებების დაცვაზე ორიენტირებული ქვეყანა.