შინაგან საქმეთა სამინისტროს ქვემო ქართლის პოლიციის დეპარტამენტის მარნეულის რაიონული სამმართველოს და ცენტრალური კრიმინალური პოლიციის დეპარტამენტის ნარკოტიკების უკანონო ბრუნვის წინააღმდეგ ბრძოლის მთავარი სამმართველოს თანამშრომლებმა ერთი პირი დააკავეს. დაკავებულს ნარკოტიკული ნივთიერების უკანონო შეძენა-შენახვა, გადაზიდვა და საქართველოში უკანონოდ შემოტანა ედება ბრალად.

უწყების ინფორმაციით, სამართალდამცველებმა, დაკავებულის პირადი ჩხრეკისას, 140 აბი „პირალგინი“ ნივთმტკიცებად ამოიღეს. მათივე ინფორმაციით, ექსპერტიზამ დაადგინა, რომ ნივთიერება ნარკოტიკულ ნივთიერება კოდეინის მარილს შეიცავდა.

"გამოძიებამ დაადგინა, რომ ბრალდებულს ნარკოტიკული ნივთიერების შემცველი პრეპარატი საქართველოში სომხეთის რესპუბლიკიდან უკანონოდ შემოჰქონდა. დაკავებული ჩადენილ დანაშაულს აღიარებს," - აღნიშნავენ უწყებაში.

საქმეზე გამოძიება საქართველოს სისხლის სამართლის კოდექსის 260-ე მუხლის პირველი და 262-ე მუხლის პირველი ნაწილით მიმდინარეობს. ეს მუხლები ნარკოტიკული ნივთიერების უკანონო შეძენა-შენახვას, გადაზიდვასა და საქართველოში უკანონოდ შემოტანას გულისხმობს.