სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა დუშეთის მუნიციპალიტეტის გამგებლის ყოფილ წარმომადგენელს ჟინვალის ადმინისტრაციულ ერთეულში, შალვა გოგოჭურს, სამსახურებრივი გულგრილობის ბრალდება წაუყენეს.

უწყების ინფორმაციით, 2016 წლის ნოემბერში გოგოჭურმა არაჯეროვნად შეასრულა სამსახურეობრივი უფლებამოსილება და სამსახურებრივი ბეჭედი და თაბახის ფურცლებზე შესრულებული ხელმოწერები გადასცა თავის თანაშემწეს. სუს-ში აღნიშნავენ, რომ ამ თანაშემწემ 700 ლარის სანაცვლოდ დაამზადა სოფლის მეურნეობის პროდუქტის წარმომავლობის ყალბი სამი ცნობა და გადასცა მოქალაქეს, რითაც სახელმწიფოს კანონიერი ინტერესები დაირღვა. აღნიშნული პირი 2016 წლის ნოემბერში სახელმწიფო უსაფრთხოების სამსახურის ანტიკორუფციულმა სააგენტომ ქრთამის აღების ბრალდებით დააკავა.

საქმეზე გამოძიება სამსახურებრივი გულგრილობის მუხლით მიმდინარეობს. საქართველოს სისხლის სამართლის კოდექსის 342-ე მუხლის მიხედვით, ბრალის დამტკიცების შემთხვევაში, სასჯელის სახით გათვალისწინებულია თავისუფლების აღკვეთა სამ წლამდე ვადით.