ცნობილმა მომღერალმა ჯასტინ ბიბერმა რამდენიმე კონცერტი გააუქმა. ამის მიზეზი კი სახის მარჯვენა ნაწილის დამბლა გახდა, რომელიც, მომღერლის თქმით, მას რამსი ჰანტის სინდრომის გამო აქვს. მან ინსტაგრამზე ვიდეო გამოაქვეყნა, სადაც გამომწერებს აჩვენებს, რომ სახის მარჯვენა ნაწილს ვერ ამოძრავებს — ვერ ახამხამებს თვალს, ვერ იღიმის და ა.შ.

"როგორც ჩემს სახეზე ხედავთ, რამსი ჰანტის სინდრომი მაქვს. როგორც ხედავთ, ამ თვალს ვერ ვახამხამებ. ამ მხარეს ვერ ვიღიმი. ეს ნესტო არ მოძრაობს. სახის ეს მხარე პარალიზებული მაქვს", — ამბობს ჯასტინი ვიდეოში.

აღნიშნულ სინდრომს ვირუსი იწვევს, რომელიც ყურთან ახლოს მდებარე ნერვულ უჯრედებს აზიანებს. მას ზოგჯერ სმენის დროებითი დაკარგვა და, როგორც ჯასტინის შემთხვევაში მოხდა, დამბლაც ახასიათებს. ზოგიერთ შემთხვევაში ეს სიმპტომები სამუდამოა.

ჯასტინმა კონცერტების გაუქმებით გულნატკენ ფანებს მიმართა და უთხრა, რომ სცენაზე გამოსვლა ფიზიკურად არ შეუძლია და აშკარაა, რომ დასვენება სჭირდება მანამ, სანამ მისი სახე ძველებურ მდგომარეობას არ დაუბრუნდება.

"არ მინდოდა, ასე მომხდარიყო, მაგრამ ჩემი სხეული მეუბნება, რომ უნდა შევისვენო. იმედი მაქვს, გამიგებთ, მე კი ამ დროს დასვენებისთვის გამოვიყენებ, რათა ჩემს 100%-ს დავუბრუნდე და ის ვაკეთო, რის გასაკეთებლადაც დავიბადე", — ამბობს მომღერალი.