თბილისის წიგნის საერთაშორისო ფესტივალი 25-28 მაისს, წელს უკვე მეცხრამეტედ გაიმართება. ფესტივალი, ექსპო ჯორჯიას მე-11 პავილიონში, ყოველდღე, 11-დან 20 საათამდე გაგრძელდება.

საქართველოს წიგნის გამომცემელთა და გამავრცელებელთა ასოციაციის ინფორმაციით, წელს ფესტივალს ნორვეგიული ფონდი NORLA და 4 ნორვეგიელი მწერალი სტუმრობს. ფესტივალის ფარგლებში ნორვეგიული ფონდი NORLA – Literature abroad-ის წარმომადგენელი დინა როლ-ჰანსენი და ოთხი ნორვეგიელი მწერალი: როსკვა კორიცინსკი, სიგბიორნ მოსტუე, სიმენ ეკერნი და ნილს ჰენრიკ სმითი მკითხველებთან შეხვედრებს გამართავენ.

ფესტივალის მთავარი სცენა ოთხი დღის განმავლობაში მუდმივად დატვირთული იქნება სხვადასხვა ტიპის ღონისძიებებით.

ღონისძიების ოფიციალური მხარდამჭერია საქართველოს კულტურისა და ძეგლთა დაცვის სამინისტრო, პრეზიდენტის სარეზერვო ფონდი და თბილისის მერია.