ზუგდიდში კონსტიტუციური კანონპროექტის საყოველთაო-სახალხო განხილვის მიზნით საორგანიზაციო კომისია საზოგადოების ნაწილს ხვდება. შეხვედრაზე კომისიის წევრები კონსტიტუციის პროექტთან დაკავშირებით აზრებს გამოთქვამენ და შეკრებილი საზოგადოების მოსაზრებებს ისმენენ.

როგორც რუსთავი 2-თან განხილვაზე დამსწრე ერთ-ერთმა პირმა თქვა, დამსწრეთა სია წინასწარ ჩამოწერილი იყო და მას შეხვედრაზე შესასვლელად წინააღმდეგობის გაწევა მოუწია. ამავე მასალიდან ირკვევა, რომ დამსწრეთა ნაწილი საჯარო სამსახურშია დასაქმებული.

კონსტიტუციის პროექტის განხილვამდე ქართული ოცნების დეპუტატმა, ზვიად ძიძიგურმა განაცხადა, რომ კონსტიტუციის პროექტი მოქმედ კონსტიტუციის გაუმჯობესებული ვერსიაა. შენიშვნები კი, რომელიც შეხვედრებზე გამოითქმება ოქმში აისახება და პარლამენტი კენჭს უყრის.

საპარალამენტო უმცირესობა, ევროპული საქართველო კი, მოქალაქეების მოსაზრებების ასასახად პლებისციტის ჩატარებას ითხოვს.

საყოველთაო-სახალხო განხილვას ესწრება საქართველოს პრეზიდენტი გიორგი მარგველაშვილიც, რომელიც დღეს ამ შეხვედრის დაწყებამდე "კონსტიტუცია ყველას" ფარგლებში სტუდენტებს შეხვდა.

კონსტიტუციური კანონპროექტის საყოველთა-სახალხო განხილვის მიზნით საორგანიზაციო კომისია საზოგადოების ნაწილს უკვე შეხვდა ბათუმში, ჩოხატაურსა და ამბროლაურში.

საყოველთაო-სახალხო განხილვის საორგანიზაციო კომისიის შექმნის თაობაზე საქართველოს პარლამენტის დადგენილება 3 მაისით თარიღდება.

კომისიის წევრები არიან:

  • ირაკლი კობახიძე – საქართველოს პარლამენტის თავმჯდომარე (კომისიის თავმჯდომარე);
  • თამარ ჩუგოშვილი – საქართველოს პარლამენტის თავმჯდომარის პირველი მოადგილე;
  • ირმა ინაშვილი – საქართველოს პარლამენტის თავმჯდომარის მოადგილე;
  • სერგი კაპანაძე – საქართველოს პარლამენტის თავმჯდომარის მოადგილე;
  • ზურაბ ჭიაბერაშვილი – საქართველოს პარლამენტის წევრი;
  • ვასილ გონაშვილი – ექსპერტი;
  • თენგიზ შარმანაშვილი – ექსპერტი, საქართველოს პარლამენტის თავმჯდომარის თანაშემწე;
  • ეკა გიგაური – საერთაშორისო გამჭვირვალობა − საქართველოს აღმასრულებელი დირექტორი;
  • თორნიკე ჭეიშვილი – საქართველოს პარლამენტის თავმჯდომარის კაბინეტის მთავარი სპეციალისტი (კომისიის მდივანი).