ლეგენდარული ინგლისელი ავტორის, ნილ გეიმანის, ცნობილი კომიქსების სერია The Sandman-ის მიხედვით გადაღებული სერიალი, რომელსაც გულშემატკივრები დიდხანს ელოდნენ, ამ ზაფხულს გამოვა. ნეტფლიქსის მაყურებელი მას 5 აგვისტოდან იხილავს.

სერიალის გამოსვლის თარიღთან ერთად, გამოქვეყნდა ტრეილერი, სადაც ჩანს, როგორ იჭერენ და ატყვევებენ ჯადოქრები ისტორიის მთავარ პერსონაჟს, მორფესს, იმავე სიზმარს. მორფევსი, რომელიც მანამდე სიზმრების სამყაროს მბრძანებელი იყო, გათავისუფლების შემდეგ იძულებულია, ხელახლა ააგოს თავისი სამფლობელო. სიზმარი უსასრულობიდან — 7 უკვდავი ემოციიდან და იდეიდან (როგორიცაა სიკვდილი ან სურვილი) ერთ-ერთია.

"სიზმრები და კოშმარები თავიანთ მბრძანებელს ვეღარ სცნობენ", — ამბობს პერსონაჟი ტრეილერში, — "დროა, მათ ეს შევახსენო".

ტრეილერში ასევე ვხედავთ ამბის სხვა მთავარ პერსონაჟებსაც.

კომიქსების სერია The Sandman 1989 წლიდან 1996 წლამდე გამოდიოდა და ჯამში 75 გამოცემას აერთიანებს. არაერთი პრიზის მფლობელი ნამუშევარი გრაფიკულ ნაწარმოებებს შორის დღემდე მიიჩნევა კლასიკად.

ამ კომიქსებით ნეტფლიქსის დაინტერესების შესახებ წლების წინ გავიგეთ, 2019 წელს კი შევიტყვეთ, რომ მასზე სერიალს გადაიღებდნენ. 2020 წელს ნეტფლიქსმა ასევე დაადასტურა, რომ პროექტი მთლიანად გეიმანის ნაწარმოებზე იქნებოდა დაფუძნებული.

აღსანიშნავია, რომ პროექტის განხორციელებაში თავად ავტორიც აქტიურად იყო ჩართული — ნილ გეიმანმა, დევიდ გოიერთან და ალან ჰაინბერგთან ერთად, აღმასრულებელი პროდიუსერის როლი მოირგო.

გეიმანის ნაწარმოებების მიხედვით აქამდეც არაერთხელ შეუქმნიათ წარმატებული ეკრანიზაციები. მათგან ყველაზე ცნობილებია Good Omens და American Gods.

ასევე იხილეთ: