პარლამენტის თავმჯდომარემ, შალვა პაპუაშვილმა დეპუტატებს და ჟურნალისტებს მოუწოდა, ჩართონ წამზომი სალომე სამადაშვილის სიტყვით გამოსვლისას და ნახონ ერთი წუთის განმავლობაში გამოიყენებს თუ არა ის ზიზღის ენას. მან სამადაშვილს ურჩია, რომ "თავს დაუფიქრდეს".

"მოგიწოდებთ ყველა დეპუტატს, მოვუწოდებ ჟურნალისტებს, ქალბატონი სალომე რომ გამოვა, პირდაპირ ჩართეთ წამზომი და დაელოდეთ, თუ ერთ წუთში არ იქნება ზიზღის რამე სიტყვა, ერთი წუთი თუ გაძლებს, რომ შიგნით ზიზღი არ გამოურიოს. ერთი კითხვა დასვა და მეორე დააზუსტა, ორჯერვე ჯერ კლოუნიო თქვა, მერე ქალბატონ მაკაზე თქვა დაქირავებულიო, მერე თქვა მოძალადეები.

არ ვიცი, რა გითხრათ, რა პოლიტიკურ კულტურაზე ვისაუბრო და რა იმედი გვაქვს, როცა ის თავად საუბრობს, რომ კოლეგებს ევროპაში ელაპარაკება და არწმუნებს. ხომ ხვდებით, რაზე ელაპარაკება? რაზე უნდა ელაპარაკოს? იმაზე, რომ კლოუნები არიან ხელისუფლებაში. იმაზე, რომ დაქირავებულები არიან ხელისუფლებაში. იმაზე, რომ მოძალადეები არიან. იმაზე, რომ ზიზღია და ეს არის მისი პოლიტიკური ამოცანა. ერთადერთი რჩევა მექნება მის მიმართ, რეფლექსია მოახდინოს, თავს დაუფიქრდეს", — თქვა მან.

პარლამენტში სიტყვით გამოსვლისას ლელოს წევრი, სალომე სამადაშვილი მმართველი პარტიის მიმართ კლავ კრიტიკული განცხადებებით გამოირჩეოდა. ამის გამო ქართული ოცნების დეპუტატმა, ირაკლი ზარქუამ მას "ხელმოცარული დიპლომატი" უწოდა.