ღამით ძილი ბევრმა რამემ შეიძლება დაგიფრთხოთ, იქნება ეს ხმაური, სინათლე თუ სხვა. გამოუძინებლობა ადამიანის ორგანიზმზე უარყოფით გავლენას ახდენს. მაგალითად, იცვლება სისხლში შაქრის დონე, მეტაბოლიზმი და იმუნური სისტემის ფუნქციონირება. ასევე, ქვეითდება კოგნიტიური უნარები.

რა თქმა უნდა, ძნელია, ძილი ყოველდღიურად სრულყოფილი იყოს, რადგან ხელისშემშლელი ფაქტორების რაოდენობა ძალიან დიდია. ამის მიუხედავად, თქვენი ჯანმრთელობისთვის აუცილებელია იცოდეთ, როგორ უნდა აინაზღაუროთ მისი დანაკლისი, რა უნდა გააკეთოთ და რისგან შეიკავოთ თავი.

წინამდებარე სტატიაში სწორედ ამ საკითხზე გესაუბრებით და რამდენიმე რჩევას მოგცემთ.

დაუბრუნდით ძილის ჩვეულ რეჟიმს

ზოგადად, გამოძინებისთვის 7-8 საათია საჭირო, შესაბამისად, ფხიზლად გატარებული ღამის საათები "ძილის ვალში" გადადის და დროთა განმავლობაში გროვდება. ალბათ, ბევრ თქვენგანს უფიქრია, რომ ამ დანაკლისს კვირის ბოლოს დიდხანს ძილით აინაზღაურებს, მაგრამ, სპეციალისტთა განცხადებით, ჩვენი სხეული ასე არ მუშაობს.

ყველაზე ოპტიმალური გამოსავალი ძილის ჩვეული რეჟიმის აღდგენაა, თანაც მომდევნო ღამიდანვე. პირველ რიგში, ეს "ვალის" გაზრდას აგაცილებთ თავიდან, მეორე მხრივ კი ცირკადულ რიტმს მოგიწესრიგებთ. იმ შემთხვევაში, თუ დასვენების დღეებში საწოლში მაინც მეტი დროის გატარება გირჩევნიათ, სჯობს შემდეგი რჩევა გაითვალისწინოთ: ვთქვათ, ჩვეულებრივ 7 საათზე იღვიძებთ, შეგიძლიათ, შაბათს 9-ზე გაიღვიძოთ, კვირას კი 8-ზე, რათა ორშაბათს ისევ ადრე ადგომა არ გაგიჭირდეთ.

თავი შეიკავეთ შუადღის ძილისგან

უძილო ღამის შემდეგ, დიდი ალბათობით, თავს მოთენთილად იგრძნობთ და მცირე ხნით წათვლემა მოგინდებათ, მაგრამ ეს საუკეთესო გამოსავალი ნამდვილად არაა. საქმე იმაშია, რომ ენერგიის მომატების ნაცვლად, მსგავსი რამ ძილის რეჟიმს უარესად დაგირღვევთ. სჯობს, ეს სიამოვნება ღამისთვის შემოინახოთ და ჯანსაღად გამოიძინოთ.

ეცადეთ, ყოველ ღამე დასაძინებლად ერთსა და იმავე დროს დაწვეთ, დაახლოებით მაინც, ისე, რომ 30 წუთზე მეტი ხნით არ გადააცილოთ. იგულისხმება, როგორც ნაადრევი ჩაძინება, ასევე, დაგვიანებული.

საჭიროების შემთხვევაშიც კი, დღისით 20 წუთზე მეტხანს ნუ დაიძინებთ

უძილობა ზოგჯერ ჩვენზე იმდენად უარყოფითად აისახება, რომ თვალების გახელა, კონცენტრაცია და წონასწორობის შენარჩუნებაც კი გვიძნელდება, ამიტომ მსგავს სიტუაციაში ერთადერთი გამოსავალი "მინი-თვლემაა". ეს ძალების აღდგენაში ოდნავ მაინც დაგეხმარებათ.

ასეთი ძილის იდეალური ხანგრძლივობა 20 წუთია, რის შემდეგაც ადამიანი უკვე ღრმა ძილში გადადის. ამის გამოსარიცხად, შეგიძლიათ მაღვიძარა დააყენოთ და ცოტა ხნით ადრე ყავა მიირთვათ. კოფეინი მოქმედებას ნახევარ საათში იწყებს და ორგანიზმს ბუნებრივად აფხიზლებს.

გასათვალისწინებელია, რომ ამ ყველაფრის მიუხედავად, კოფეინთან ფრთხილად უნდა იყოთ, რადგან მისი ამგვარი გავლენა 10 საათის განმავლობაში გრძელდება. შესაბამისად, კარგი იქნება, თუ ყავას შუადღის შემდეგ არ დალევთ.

როდის უნდა მიმართოთ ექიმს

როგორც უკვე აღვნიშნეთ, ზოგჯერ ძილის დარღვევა გარე გამღიზიანებლებისა და სხვა მაპროვოცირებელი მიზეზების გამო, სრულიად ნორმალურია, მაგრამ თუ ეს ზედმეტად დიდხანს გრძელდება, აუცილებლად სპეციალისტს უნდა მიმართოთ. ამ დროს საქმე შესაძლოა, ინსომნიასთან გქონდეთ, რომლისგან თავის დასაღწევადაც ექიმი სათანადო მკურნალობას დაგინიშნავთ.

დაბოლოს, ნუ დაჯდებით საჭესთან გამოუძინებელი, განსაკუთრებულად მაშინ, თუ: ამთქნარებთ, თვალებს ვერ ახელთ, თავს მაღლა ვერ სწევთ, ითიშებით, ვერ ამჩნევთ საგზაო ნიშნებს და ა.შ.

რუბრიკის სპონსორია ექიმო. ექიმო არის აპლიკაცია, რომელიც სამედიცინო სერვისების მიღებას გიმარტივებთ. მისი გამოყენებით, შეძლებთ სახლში გამოიძახოთ ლაბორატორიული ანალიზები, დაჯავშნოთ ექიმთან ვიზიტი, რიგში დგომის გარეშე მიიღოთ სამედიცინო მომსახურება, მოძებნოთ მედიკამენტები და ელექტრონულად მიიღოთ კვლევებისა და მედიკამენტების დანიშნულებები, დიაგნოზები და სადაზღვევო მიმართვები.