კრემლის სპიკერის, დმიტრი პესკოვის განცხადებით, უკრაინისთვის იარაღის გადაცემით აშშ "ცეცხლზე ნავთს ასხამს". მისივე თქმით, ასეთი ქმედებები უკრაინის ხელმძღვანელობის სურვილს, რომ სამშვიდობო მოლაპარაკებები განაახლოს, ხელს არ უწყობს.

"არაფერია აქ ახალი, ჩვენ გვჯერა, რომ შეერთებული შტატები მიზანმიმართულად და გულმოდგინედ ასხამს ცეცხლზე ნავთს. აშშ, აშკარად, ნამდვილად ერთგულია იმ ხაზის, რომ ებრძოლოს რუსეთს უკანასკნელ უკრაინელამდე", — განაცხადა მან.

დღეს ამერიკის შეერთებული შტატების პრეზიდენტმა, ჯო ბაიდენმა განაცხადა, რომ ქვეყანა უკრაინას თანამედროვე სარაკეტო სისტემებითა და საბრძოლო მასალებით მოამარაგებს.

New York Times-ის მიერ გამოქვეყნებულ ოპ-ედში ბაიდენი ამბობს, რომ შეერთებული შტატების მიზანი არის დემოკრატიული, დამოუკიდებელი, სუვერენული და აყვავებული უკრაინის დანახვა, რომელსაც აქვს საშუალება შეაჩეროს და თავი დაიცვას შემდგომი აგრესიისგან.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში.