"თავისუფლება ჩემი სოფლიდან იწყება", — ამბობს მოსწავლე ზემო ნიქოზიდან, სადაც საქართველოს ბანკმა საგანმანათლებლო სივრცე — იდეათეკა შექმნა.

ვიდეორგოლში, რომლითაც საქართველოს ბანკი ბავშვთა დაცვის საერთაშორისო დღეს გვილოცავს, თავისუფლებაზე გვესაუბრებიან ბავშვები სოფელ ნიქოზის, ხურვალეთის და დიცის იდეათეკიდან.

საქართველოს ბანკი კორპორაციული სოციალური პასუხისმგებლობის ფარგლებში, უკვე მესამე წელია, იდეათეკების პროექტს ახორციელებს. საქართველოს 6 სხვადასხვა რეგიონის 9 საჯარო სკოლაში უკვე მოეწყო ფორმალური და არაფორმალური განათლების ხელშეწყობის მიზნით შექმნილი სივრცეები — იდეათეკები. შედეგად კი 5,000-მდე მოსწავლეს მიეცა წვდომა თვითგანვითარებისთვის საჭირო რესურსებზე.

იდეათეკის სივრცეებში მოსწავლეებისთვის ხელმისაწვდომია ინტერნეტი, კომპიუტერები, პროექტორები, მრავალფეროვანი ბიბლიოთეკა თუ სხვა შემეცნებითი ხელსაწყოები.

"ჩვენი მიზანია, მსგავსი პროექტებითა და ინიციატივებით, საქართველოს მასშტაბით კიდევ უფრო მეტ ახალგაზრდას შევუწყოთ ხელი განვითარებაში, საკუთარი პოტენციალის მაქსიმალურად გამოვლენასა და ათვისებაში", — ამბობენ საქართველოს ბანკში.

ამ ეტაპზე იდეათეკები გახსნილია გორის მუნიციპალიტეტის სოფლებში დიცში, ხურვალეთში, ზემო ნიქოზში, ასევე, სოფელ დუისში, თეოფანე დავითაიას სახელობის ქალაქ ფოთის #1 საჯარო სკოლაში, თბილისის 146-ე, ამბროლაურის #1 და ოზურგეთის მე-4 საჯარო სკოლაში, ახალქალაქის მე-3 სკოლაში.