როგორც იცით, HBO-ს პოპულარულ სერიალში, Veep, მეექვსე სეზონის მეორე ეპიზოდში საქართველოს შესახებ იყო საუბარი, ოღონდ, ამ შემთხვევაში საქმე ალტერნატიულ ისტორიას ეხება. სერიალის სცენარის მიხდვით, ჩვენს ქვეყანაში გადატრიალება ხდება და ახალი არჩევნები ინიშნება.

მომდევნო, ანუ მესამე სერიაში, სელენა მაიერი ახალ არჩევნებზე დამკვირვებლად ჩამოდის, ინტერვიუს რუსთავი 2-ს აძლევს და ამბობს, რომ ის მოხარულია საქართველოში პირველი დემოკრატიული არჩევნების დამკვირვებლად მოწვევის გამო.

კადრებში ჩანს საქართველოს პრეზიდენტის ამჟამინდელი რეზიდენციაც, რომელიც ტიტრის მიხედვით, პრეზიდენტ მურმან შალიკაშვილის რეზიდენციაა და აქ მიმდინარეობს შეხვედრა, რომელსაც სელენა მაიერი ესწრება.

ფოტო: HBO

ჯულია ლუი-დრეიფუსის პერსონაჟი მინა ჰაკინენის პერსონაჟს ესაუბრება, საიდანაც ვარკვევთ, რომ თურმე მურმან შალიკაშვილს, მისი კონკურენტის მოწამვლა სუშის რესტორანში უცდია, რაზეც სელენა მაიერსი პასუხობს, სასწაული ისაა, ამ ქვეყანაში სუშის რომ ჭამენ და არ კვდებიანო.

ამ დროს მასთან პრეზიდენტი შალიკაშვილი მოდის და ესალმება, რა დროსაც სელენა ხუმრობით ეკითხება, ამ ბოლო დროს ვინმე ნიჭიერი მწერალი ხომ არ დაგიპატიმრებიაო. შემდეგ შალიკაშვილი ცალკე ესაუბრება მაიერს და ცდილობს გურჯაანში გატარებული ბავშვობის შესახებ მოუყვეს.

სერიალში საქართველო მაინცდამაინც კარგ ქვეყანად არ არის წარმოჩენილი, მაგრამ ნუ დაგავიწყდებათ, ეს კომედიაა და თანაც ძალიან რეიტინგული, რაც ჩვენი ქვეყნის მიმართ ინტერესს გამოიწვევს და შესაბამისად, უფრო მეტი ადამიანი ეცდება, მოიპოვოს ინფორმაცია ჩვენ შესახებ, ხოლო სხვა, არაკომედიურ წყაროებში ნამდვილ ცნობებს მოიპოვებენ. ამიტომ გულთან ახლოს ნუ მიიტანთ და იცინეთ იმ ხუმრობებზე, რომლებიც სერიალშია.