საქართველოს კომუნიკაციების ეროვნულ კომისიასთან არსებულმა მომხმარებელთა ინტერესების დამცველმა, თამთა ტეფნაძემ, 2016 წელს, 99 635 ლარი გამოიმუშავა. ტეფნაძემ ანაზღაურების შესახებ ინფორმაცია თანამდებობის პირის მიერ შესავსებ დეკლარაციაში მიუთითა.

როგორც ტეფნაძემ On.ge-ს უთხრა, მას დეკლარაციაში ანაზღაურების შესახებ ინფორმაცია არასწორად აქვს მითითებული და აღებული ხელფასის ნაცვლად 100-ჯერ მეტი, 9 963 538 ლარი მიუთითა. ის შეცდომას ტექნიკური ხარვეზით ხსნის და მის გამოსწორებას გეგმავს.

პირველი შემთხვევა არაა, როცა ტეფნაძემ თანამდებობის პირის ქონებრივი დეკლარაცია არასწორად შეავსო. საჯარო სამსახურის ბიუროს ვებგვერდზე ტეფნაძის კიდევ ორი დეკლარაციაა ხელმისაწვდომი. მის 2015 და 2016 წელს შევსებულ დეკლარაციაში არ არის ასახული ხელფასის შესახებ ინფორმაცია.

"აუცილებლად უნდა მივმართო [საჯარო სამსახურის ბიუროს]. დავურეკე, ჩვენს პროგრამას არ აქვს პრობლემაო, მაგრამ ზუსტად ვიცი. ზუსტად აი, ეგ რომ არ მინდოდა შემშლოდა, ვცდილობდი, რომ დეტალურად წერტილ-მძიმეც კი ამესახა, თეთრებიც. გამოვითხოვე ინფორმაციაც," - ამბობს ტეფნაძე და აღნიშნავს, რომ 2015 წელს თანხა თავისი შეცდომის გამო არ აისახა.

საჯარო სამსახურის ბიუროს დეკლარაციების უზრუნველყოფის დეპარტამენტის უფროსი, დემნა ლობჟანიძე On.ge-სთან საუბრის დრო ხსნის კანონის ვალდებულებებს და ამბობს, რომ თანამდებობის პირი ვალდებულია, ყოველწლიურად შეავსოს დეკლარაცია. დეკლარაციაში კი, თანამდებობის პირმა გასული წლის განმავლობაში მიღებული ანაზღაურების შესახებაც უნდა ასახოს ინფორმაცია.

თამთა ტეფნაძე კომუნიკაციების ეროვნულ კომისიასთან არსებული მომხმარებელთა ინტერესების საზოგადოებრივი დამცველის პოსტზე 2014 წლის 11 თებერვლიდან მუშაობს. ის მანამდე პარლამენტში დარგობრივი ეკონომიკისა და ეკონომიკური პოლიტიკის კომიტეტის აპარატში მუშაობდა. სწორედ ამ კომიტეტმა გამოაცხადა კომუნიკაციების კომისიაში მის თანამდებობაზე კონკურსი.

მომხმარებელთა ინტერესების საზოგადოებრივი დამცველის აპარატში ნეპოტიზმის სავარაუდო ფაქტების შესახებ სტატია 2016 წლის სექტემბერში საერთაშორისო გამჭვირვალობა - საქართველომ გამოაქვეყნა.

"ამ მომენტისათვის [TI-ის სტატიის გამოქვეყნების დრო] მომხმარებელთა ინტერესების საზოგადოებრივი დამცველის სამსახურში მუშაობს: ზურაბ ტყემალაძის ძმის შვილიშვილი, ზურაბ ტყელამაძის ნათლული, ზურაბ ტყემალაძის კომიტეტის ყოფილი თანამშრომელი თამთა ტეფნაძე, პარლამენტარ დიმიტრი ხუნდაძის შვილი. ტეფნაძის თანაშემწედ ასევე მუშაობს მისივე მეჯვარე, ნათია ფანგანი რომელიც აპარატში 2015 წელს დაინიშნა," - ვკითხულობთ საერთაშორისო გამჭვირვალობა - საქართველოს მიერ გამოქვეყნებულ ინფორმაციაში.

კომუნიკაციების მომხმარებელთა ინტერესების დამცველმა 2016 წელს მომხმარებლებისგან სულ 208 საჩივარი მიიღო. ამ საჩივრებიდან 122 დაკმაყოფილდა, 24 შემთხვევაში დარღვევა არ დადასტურდა, 62 შემთხვევაში კი დაკმაყოფილდა/მიეცა განმარტება.