უკრაინის სახალხო დამცველი, ლუდმილა დენისოვა აცხადებს, რომ ყოველდღიურად ცხელ ხაზზე ოკუპანტების მიერ სექსუალური ძალადობის არაერთი შემთხვევა ფიქსირდება. მისი თქმით, მხოლოდ გუშინ ცხელ ხაზს 10-მა მსხვერპლმა მიმართა, რომელთაგან 8 გაუპატიურების მსხვერპლი არასრულწლოვანია.

დენისოვას თქმით, რუსმა ჯარისკაცებმა გააუპატიურეს 9 წლის ტყუპი გოგოები. მათ მძიმე დაზიანებები აქვთ და ეს ყველაფერი დედის თვალწინ მოხდა. ომბუდსმენი წერს, რომ ოკუპანტებმა გააუპატიურეს 9 თვის გოგო, ასევე ერთი წლის ბიჭი, რომელიც გარდაიცვალა, ხოლო გაუპატიურების მსხვერპლი კიდევ ერთი 2 წლის გოგო გადარჩა.

სახალხო დამცველის განცახდებით, ეს არის უკრაინელი ხალხის გენოციდი განსაკუთრებული სისასტიკით. მისივე თქმით, ეს არის არამარტო საერთაშორისო ჰუმანიტარული სამართლის ნორმების, არამედ მისი არსის, ცივილიზებული სამყაროს მორალის დარღვევა.

დენისოვა მიმართავს გაეროს ადამიანის უფლებათა დარღვევის საგამოძიებო კომისიას, უკრაინაში რუსეთის სამხედრო შეჭრის დროს, გაითვალისწინოს უკრაინელი ხალხის გენოციდის ეს ფაქტები. ასევე, მოუწოდებს პარტნიორებს მთელ მსოფლიოში, გაზარდონ სანქციების ზეწოლა რუსეთზე, მიაწოდონ უკრაინას იარაღი და შეუერთდნენ რუსების დანაშაულების გამოძიებას.