მომავალი 7 წლის განმავლობაში პენსიების გამცემი ბანკი კვლავ ლიბერთი იქნება. ამის შესახებ მთავრობის სხდომაზე ჯანდაცვის მინისტრმა, ზურაბ აზარაშვილმა ისაუბრა. აღსანიშნავია, რომ სოციალური მომსახურების სააგენტოს მიერ გამოცხადებული ტენდერის ოფიციალური შედეგები ჯერ არ გამოქვეყნებულა.

"დღეს დასრულდა ტენდერი, რომელიც გამოცხადებული გვქონდა ჩვენი პენსიონერებისთვის მნიშვნელოვნად გაუმჯობესებული პირობებით. ტენდერში გაიმარჯვა იგივე ბანკმა, რომელიც წლებია ემსახურება და ესეც მნიშვნელოვანია, რომ ინფრასტრუქტურულად და სხვადასხვა რისკების კუთხით ისევ ლიბერთი ბანკი გააგრძელებს მათ მომსახურებას", — თქვა მინისტრმა.

ზურაბ აზარაშვილმა საპენსიო სესხების საპროცენტო განაკვეთზეც ისაუბრა და თქვა, რომ პენსიონერებისთვის სესხების მომსახურების პირობები მნიშვნელოვნად გაუმჯობესდება. მისივე თქმით, არსებული მდგომარეობით, საპენსიო სესხის საპროცენტო განაკვეთი 25,8% იქნება.

"სესხები, რომლებსაც პენსიონერებისთვის გასცემენ მიბმული იქნება რეფინანსირების განაკვეთზე, 6-თვიანი ტიპის განაკვეთზე და იქნება მაქსიმუმ +15%, რომელიც დღეის მდგომარეობით არის 25,8%, ნაცვლად 30,6%-სა. გამომდინარე იქიდან, რომ მოლოდინები გვაქვს რეფინანსირების განაკვეთის შემცირების, ეს განაკვეთიც მნიშვნელოვნად შემცირდება და ამ წლების განმავლობაში პენსიონერებს კიდევ უფრო გაუიაფდებათ სესხის მომსახურების პირობები", — თქვა ზურაბ აზარაშვილმა.

სოციალური მომსახურების სააგენტოს მიერ გამოცხადებული ტენდერის ჯამური ღირებულება 105 000 000 ლარია, რაც ნიშნავს იმას, რომ სახელმწიფო ლიბერთი ბანკს ყოველწიურად 15 მილიონ ლარს გადაუხდის.

როგორც ცნობილია, სახელმწიფოს მხრიდან ტენდერში გამარჯვებული ბანკისთვის ყოველწლიურად გადახდილი 15 მილიონი ლარი ერთგვარი სუბსიდიაა, რომელიც საპენსიო სესხზე საპროცენტო განაკვეთის ზედა ზღვრის დაწესებისთვის გაიცემა.