იუსტიციის მინისტრი, რატი ბრეგაძე მიხეილ სააკაშვილის საზღვარგარეთ სამკურნალოდ გადაყვანასთან დაკავშირებით ამბობს, რომ საქართველოში მსგავსი პრეცედენტი არ არსებობს და ამის შესაძლებლობას კანონმდებლობაც არ იძლევა. ამის შესახებ მან იმედის ეთერში ისაუბრა.

"საქართველოში მსჯავრდებული პატიმარი სასჯელს იხდის საქართველოს ტერიტორიაზე. ეს არის საზღვარგარეთ გადაყვანასთან დაკავშირებული პასუხი. არც ამის [საზღვარგარეთ გადაყვანის] პრეცედენტი არსებობს და არც კანონმდებლობა იძლევა მსჯავრდებული პატიმრის საზღვარგარეთ გაყვანის შესაძლებლობას. ჩვენ ვიმოქმედებთ ყოველთვის მკაცრად კანონმდებლობის ზედმიწევნით დაცვით და ბუნებრივია, ექიმების რეკომენდაციის შესაბამისად", — განაცხადა მან.

გუშინ, 11 მაისს გავრცელდა ინფორმაცია, რომ სააკაშვილი ვივამედში გადაჰყავდათ. შესაბამის უწყებებს ოფიციალური განცხადება ამ დრომდე არ გამოუქვეყნებიათ. ამასთან, სხვადასხვა მედიის კადრებში ჩანდა, რომ ტერიტორიაზე პოლიციელები იყვნენ მობილიზებული. On.ge პენიტენციურ სამსახურთან ცდილობდა დაკავშირებას, თუმცა ისინი ზარებს არ პასუხობდნენ.

დღეს გიული ალასანიამ მიხეილ სააკაშვილი ვივამედში მოინახულა და აღნიშნა, რომ ექსპრეზიდენტი ძალიან სუსტად არის. მისი თქმით, სააკაშვილის მდგომარეობა ახლა უფრო მძიმე იყო, ვიდრე ორი დღის წინ, როცა პენიტენციურში ინახულა.

10 მაისს იუსტიციის მინისტრმა, რატი ბრეგაძემ განაცხადა, მიხეილ სააკაშვილს, შესაძლო გართულებების თავიდან არიდების მიზნით, შესთავაზებდნენ, რომ გადაიყვანონ კლინიკა ვივამედში, სადაც მას გამოკვლევებს ჩაუტარებენ. ამავე დღეს სააკაშვილმა კლინიკაში გადასაყვანად რამდენიმე პირობა დაასახელა.

ამავე თემაზე: