პოლონეთის პრემიერმინისტრის, მატეუშ მორავიეცკის განცხადებით, რუსეთის პრეზიდენტი, ვლადიმერ პუტინი ადოლფ ჰიტლერსა და იოსებ სტალინზე უფრო საშიშია. მისი თქმით, დღეს პუტინს უფრო მომაკვდინებელი იარაღები და პროპაგანდისთვის გასავრცელებელი მედია ჰყავს. ამის შესახებ მორავიეცკი Telegraph-ზე გამოქვეყნებულ სტატიაში წერს.

"ბუჩას, ირპენის, მარიუპოლის ქუჩები უდანაშაულოების სისხლით არის გაჟღენთილი. რაც უკრაინაში ხდება, დაწყევლილი იდეოლოგიის დაბრუნებას ნიშნავს. ამაში ირონია ის არის, რომ პუტინმა რუსული იმპერიალიზმი ნაციზმზე გამარჯვების მითზე ააგო და მისი პროპაგანდა უკრაინის წინააღმდეგ აგრესიას ქვეყნის "დენაციფიკაციის" ოპერაციით აღწერს.

პუტინი არც ჰიტლერია და არც სტალინი. სამწუხაროდ, ის უფრო საშიშია. მას ხელთ აქვს არა მხოლოდ უფრო მომაკვდინებელი იარაღები, არამედ ახალი მედია მისი პროპაგანდის გასავრცელებლად. არცთუ ისე დიდი ხნის წინ, პოლონეთი რუსეთთან მეორე მსოფლიო ომის წარმომავლობის შესახებ საინფორმაციო ომში ჩაება. ჩვენ მოვიგეთ, მაგრამ პუტინმა მის მიზნებს მიაღწია. მან ინტერნეტი დააინფიცირა მილიონობით ყალბი ამბით", — წერს ის.

მისი თქმით, დღეს რუსეთისა და ცივილიზებული სამყაროს ერთადერთი შანსი "დეპუტინიზაციაა", რასაც სასწრაფოდ უნდა ჩაეჭიდნონ უკრაინისა და თავისუფლების გადასარჩენად.

"როგორც ერთ დროს გერმანია იყო დენაციფიკაციის ობიექტი, დღეს რუსეთისა და ცივილიზებული მსოფლიოს ერთადერთი შანსი "დეპუტინიზაციაა". თუ სასწრაფოდ არ ჩავებმებით ამ ამოცანაში, არა მხოლოდ უკრაინას დავკარგავთ, არამედ დავკარგავთ ჩვენს სულს და ჩვენს თავისუფლებას, ასევე, სუვერენიტეტს. იმიტომ, რომ რუსეთი კიევზე არ გაჩერდება. მას განზრახული აქვს დასავლეთისკენ მსვლელობა და ეს ჩვენზეა დამოკიდებული, როდის შევაჩერებთ", — აცხადებს მორავიეცკი.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში