საქართველოს პრემიერმინისტრმა გიორგი კვირიკაშვილმა ამერიკელი კონგრესმენების მიერ დონალდ ტრამპისადმი საქართველოს მხარდამჭერი წერილით მიმართვა მთავრობის სხდომაზე შეაფასა:

"ამერიკელი კონგრესმენების მხარდამჭერი მიმართვა მეტყველებს იმაზე, რომ საქართველო არის აშშ-ის ძალიან მნიშვნელოვანი პარტნიორი. ასე იყო ეს გასული 25 წლის განმავლობაში და ჩვენ დიდი იმედი გვაქვს, რომ მომავალი 25 წლის მანძილზე შევძლებთ, რომ კიდევ უფრო მჭიდრო პარტნიორობა შევქმნათ".

გიორგი კვირიკაშვილი დარწმუნებულია, რომ კონგრესმენების განწყობას და სულისკვეთებას იზიარებს ამერიკის პრეზიდენტი დონალდ ტრამპი:

"ბოლო პერიოდში კონგრესმა რამდენიმე მნიშვნელოვანი რეზოლუცია მიიღო - ტერიტორიული მთლიანობის მხარდამჭერი რეზოლუცია, ასევე, ევროატლანტიკური მისწრაფებების მხარდამჭერის კუთხით. ეს ყველაფერი მეტყველებს იმაზე, რომ საქართველო არის აშშ-ის ძალიან მნიშვნელოვანი პარტნიორი. დარწმუნებული ვარ, საქართველოს მიმართ იგივე განწყობაა სენატში და ერთი წამითაც არავის ეპარება ეჭვი, რომ ზუსტად ასეთივე სულისკვეთება გააჩნია ამერიკის პრეზიდენტს, ბატონ დონალდ ტრამპს".

აშშ-ის წარმომადგენელთა პალატის 30-მა კონგრესმენმა აშშ-სა და საქართველოს შორის დიპლომატიური ურთიერთობების 25 წლისთავისა და ორ ქვეყანას შორის მტკიცე სტრატეგიული პარტნიორობის აღსანიშნავად, 2017 წლის 2 მაისს საქართველოს მხარდამჭერი წერილით პრეზიდენტ დონალდ ტრამპს მიმართა.

წერილი ადასტურებს აშშ-ის მხარდაჭერას საქართველოს სუვერენიტეტისა და ტერიტორიული მთლიანობისადმი. ამასთანავე, კონგრესმენები მოუწოდებენ პრეზიდენტს, საქართველოსთან თავისუფალი ვაჭრობის შეთანხმების გაფორმების თაობაზე მოლაპარაკებების დაწყებისაკენ და ამ მიზნით ვაჭრობისა და ინვესტიციების საკითხზე მაღალი დონის დიალოგის გაღრმავებისაკენ.

კონგრესმენები ტრამპს ურჩევენ, განაგრძოს ნატო-ში გაწევრიანების გზაზე საქართველოს მხარდაჭერა. წერილში აღნიშნულია, რომ აუცილებელია საქართველოსა და ამერიკას შორის არსებული სტრატეგიული პარტნიორობის კიდევ უფრო გაღრმავება, აშშ-ის მხრიდან.