საზოგადოებაში სილამაზესთან დაკავშირებით დამკვიდრებული სტერეოტიპების გამო ხშირად ადამიანები სხვების კრიტიკას არ ერიდებიან. თუმცა ცნობილ ადამიანებს გარეგნობის გამო დაცინვის მოსმენა უფრო ხშირად უწევთ, რადგან ყოველთვის ყურადღების ცენტრში არიან.

უხეში კომენტარების ავტორები ვარსკვლავების ქილიკს საჯაროდაც არ ერიდებიან, რისი ნახვაც მილიონობით ადამიანს შეუძლია. თუმცა ამ სტატიაში კრიტიკასთან ერთად 8 ცნობილი ადამიანის პასუხს წაიკითხავ, რომლებმაც გარეგნობისა და სხეულის შესახებ უხეშ კომენტარებს საკადრისად უპასუხეს.

1. ჯენიფერ ლოპესი

2016 წლის ერთ-ერთ ინტერვიუში ჯენიფერ ლოპესმა იმის შესახებ ისაუბრა, თუ რამხელა ზეწოლას განიცდიდა ახლობელი ადამიანებისგან თავისი წონის გამო. "სულ მეუბნებოდნენ, რომ წონაში უნდა დამეკლო. ამას ჩემი მენეჯერიც მიმეორებდა, რომელთან დიდი ხანია, აღარ ვმუშაობ. მაგრამ არავის დავუჯერე. წონაში რომ დამეკლო, ეს მე აღარ ვიქნებოდი", — ამბობს მომღერალი.

2. ეშლი გრემი

2016 წლის ინსტაგრამის პოსტის კომენტარებში მოდელს "ცელულიტის გროვა" უწოდეს, რაზეც ეშლიმ ასეთი პასუხი გასცა: "ახლა მივხვდი, რომ ეს თეძოები გამარჯვებისა და გამბედაობის ისტორიას ჰყვება. არავის მივცემ უფლებას, რომ მიკარნახოს, თუ როგორი უნდა იყოს ჩემი სხეული".

3. ჯენიფერ ენისტონი

2016 წელს ჯენიფერ ენისტონის ერთ-ერთმა ფოტომ დიდი ხმაური გამოიწვია, რადგან ადამიანთა ნაწილს მსახიობი ორსულად მოეჩვენა. "მე არ ვარ ორსულად, თუმცა მედიის უხეში კომენტარებით ნამდვილად შეწუხებული ვარ. ქალების სხეულზე დაკვირვება და კონტროლი უკვე აბსურდული და შემაშფოთებელია. მედია კი ზუსტად წარმოაჩენს იმ საზოგადოების სახეს, რომელიც ქალებს სილამაზის გარკვეული სტანდარტების მიხედვით აფასებს", — განაცხადა მსახიობმა.

4. ჯენიფერ ლოურენსი

"კარიერის დასაწყისში პროდიუსერები მეუბნებოდნენ, რომ მსუქანი ვიყავი და გამათავისუფლებდნენ კიდეც, თუ წონაში არ დავიკლებდი. მათ ჩემი ნახევრადშიშველი ფოტოები მაჩვენეს და მითხრეს, რომ ეს მოტივაციისთვის გამომადგებოდა. ახლა კი ვინმემ ჩურჩულით მაინც რომ სიტყვა დიეტა მიხსენოს, მაშინვე "წადი შენის" ვუპასუხებ", — იხსენებს მსახიობი.

5. ლედი გაგა

2017 წლის Super Bowl-ზე გამოსვლის შემდეგ ლედი გაგას მუცელი კრიტიკის ობიექტი გახდა. ამის შესახებ მომღერალმა შემდეგი კომენტარი გააკეთა: "გავიგე, რომ ჩემი სხეული სალაპარაკო თემაა, ამიტომ მინდა ვთქვა, რომ ჩემი სხეულით ვამაყობ და შენც უნდა იამაყო შენით. ამისთვის კი მნიშვნელობა არ აქვს, ვინ ხარ ან რას წარმოადგენ".

6. კორტნი კარდაშიანი

ორი წლის წინ კორტნი კარდაშიანმა ინსტაგრამზე საცურაო კოსტიუმში გადაღებული ფოტო გამოაქვეყნა, რაზეც ერთ-ერთმა მომხმარებელმა დაუწერა, რომ ორსულს ჰგავს. "რამდენიმე კილოგრამს რომ მოვიმატებ, ასე გამოიყურება ჩემი სხეული, რაც ძალიანაც მომწონს. მე სამი შვილი გავაჩინე და ჩემი სხეულის ფორმა ასეთია", — კომენტარს ასე უპასუხა კორტნიმ.

7. ზენდეია

2015 წლის ოსკარის დაჯილდოების წითელ ხალიჩაზე ერთ-ერთმა ჟურნალისტმა გაშუქებისას ზენდეიას ვარცხნილობის შესახებ თქვა, რომ როცა მას ხედავს, თითქოს "მარიხუანას" სუნს გრძნობს. ამაზე კი ზენდეიამ შემდეგი პასუხი გასცა: "საზოგადოება აფროამერიკული თმის მიმართ მკაცრი კრიტიკით გამოირჩევა და მათ შეუძლიათ, ადამიანი ვარცხნილობის საფუძველზე განსაჯონ. ვფიქრობ, რომ ოსკარი 2015-ზე ჩემი ბუნებრივი თმით მისვლა კარგი გადაწყვეტილება იყო. მსურს, ფერადკანიანებს შევახსენო, რომ მათი ბუნებრივი თმა საკმაოდ კარგია".

8. და ბოლოს, ლიზო

2020 წელს ტიკტოკზე ერთ-ერთ ოჯახს ასეთი კომენტარი დაუწერეს: "შენმა შვილმა აუცილებლად უნდა ივარჯიშოს, თუ არადა შემდეგი ლიზო გახდება". ოჯახი ამ კომენტარს ვიდეოთი გამოუეხმაურა, რომელშიც ეს ტექსტი ხმამაღლა წაიკითხეს და ასე უპასუხეს: "ამბობ, რომ ჩემი შვილი მილიონერი გახდება, გრემის სამჯერ მოიგებს და თან სრულყოფილი უკანალიც ექნება?" ეს ვიდეო ლიზომ თავის ანგარიშზეც გააზიარა.

აშკარაა, რომ კომენტარის ავტორს ამდენ რამეზე არ უფიქრია.