შვეიცარიის Nespresso-ს ქარხანამ უცნაური ყავის მარცვლების ტომრები მიიღო. მოგვიანებით გაირკვა, რომ ტომრები ყავის მარცვლების ნაცვლად 500 კგ-ზე მეტი კოკაინით იყო სავსე. ქარხანაში მომუშავე ადამიანებს, რომლებსაც ყავის მარცვლებთან უშუალო შეხება აქვთ, ტომრებში თეთრი ფხვნილი დახვდათ, რის შესახებაც პოლიციას აცნობეს.

პოლიციის ანალიზმა დაადგინა, რომ ნივთიერება, რომელიც კომპანიამ ყავის მარცვლების ნაცვლად მიიღო, კოკაინი იყო. პოლიციამ იმავე დღეს ხუთი გადამზიდავი კონტეინერი გაჩხრიკა და ამოღებული კოკაინის რაოდენობამ 500 კგ-ზე მეტი შეადგინა.

ფოტო: Getty Images

პოლიციის განცხადებით, კოკაინის ამოღება დროულად მოხერხდა და მისი შერევა ქარხანაში წარმოებულ პროდუქციასთან არ მომხდარა. "ჩვენი პროდუქცია სრულიად უსაფრთხოა და გვსურს, მომხმარებლები ამაში დავარწმუნოთ", — ნათქვამია Nespresso-ს ოფიციალურ განცხადებაში.

"როგორც ჩანს, კოკაინი ევროპის ბაზრისთვის იყო განკუთვნილი", — ამბობს ადგილობრივი პოლიციელი. მისი თქმით, ტვირთი სავარაუდოდ ბრაზილიიდან ჩამოიტანეს. ამოღებული კოკაინის 80% ძალიან მაღალი ხარისხის იყო და ტვირთის ფასი დაახლოებით 53 მილიონ დოლარს შეადგენს.