ბელარუსის პრეზიდენტი, ალექსანდრ ლუკაშენკო ფიქრობს, რომ უკრაინაში რუსეთის "ოპერაცია" გაჭიანურდა. ამის შესახებ მან AP-თან ინტერვიუში თქვა. ლუკაშენკო ამბობს, რომ ომის შესაჩერებლად "ყველაფერს აკეთებდა".

"არ ვარ ამაში იმდენად ჩართული, რომ ვთქვა, მიდის თუ არა ის გეგმის მიხედვით, ისე, როგორც რუსები ამბობენ, ან როგორც მე ვგრძნობ. კიდევ ერთხელ მინდა ხაზი გავუსვა, ვგრძნობ, რომ ოპერაცია გაჭიანურდა", — ამბობს ის.

ლუკაშენკოს მტკიცებით, უკრაინა რუსეთის პროვოცირებას ახდენს და დასძენს, რომ ბელარუსი მშვიდობის მომხრეა.

"ჩვენ კატეგორიულად არ ვეთანხმებით ომს. ჩვენ ყველაფერს ვაკეთებდით და ვაკეთებთ, რომ ომი არ იყოს. თქვენი მონა-მორჩილის, ანუ, ჩემი წყალობით, რუსეთსა და უკრაინას შორის მოლაპარაკებები დაიწყო [...] მაგრამ, რატომ არ არის უკრაინა ამ მოლაპარაკებებით დაინტერესებული?" — დასძენს ლუკაშენკო.

ბელარუსის პრეზიდენტი ამბობს იმასაც, რომ მისთვის ბირთვული იარაღის გამოყენება "მიუღებელი" იქნება, მაგრამ ვერ იტყვის, აქვს თუ არა რუსეთს ასეთი გეგმები. ლუკაშენკო ირწმუნება, რომ რუსეთს NATO-სთან პირდაპირი დაპირისპირება არ სურს და დასავლეთს ამის პრევენციისკენ მოუწოდებს.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში