ევროკავშირმა რუსეთის წინააღმდეგ სანქციების მეექვსე პაკეტს რუსეთის მოქალაქეებისთვის ქონებასთან დაკავშირებული გარიგებების აკრძალვა დაამატა. ამის შესახებ Bloomberg წერს.

გამოცემის ინფორმაციით, ევროკომისიის წინადადება მიმართულია იმისკენ, რომ ევროკავშირში რუსეთის მოქალაქეებთან და რეზიდენტებთან უძრავ ქონებასთან დაკავშირებული გარიგებები შეჩერდეს. აქ იგულისხმება უძრავი ქონების როგორც ირიბი, ისე პირდაპირი გზით გაყიდვა და გადაცემა.

Bloomberg წერს, რომ ეს აკრძალვა ევროკავშირის მიერ რუსეთისთვის დაწესებული იმ სანქციების ნაწილია, რომელიც რუსული ნავთობისა და ქვეყნის უმსხვილესი ბანკის, სბერბანკის წინააღმდეგ არის მიმართული.

აკრძალვა იმ რუსებს შეეხება, რომლებიც ევროკავშირის მოქალაქეები არ არიან და არ აქვთ ევროკავშირის წევრ ქვეყნებში ბინადრობის უფლება.