უკვე ყველასთვის ცნობილია, რომ ილონ მასკი სოციალურ ქსელ Twitter-ს 44 მილიარდ დოლარად ყიდულობს. მასკი ტვიტერის საკმაოდ აქტიური მომხმარებელია და ამჯერადაც ეს პლატფორმა შემდეგ პოტენციურ სამიზნეზე ხუმრობისთვის გამოიყენა.

"შემდეგში კოკა-კოლას ვიყიდი და მასში კოკაინს დავაბრუნებ" — დაწერა მან.

ილონ მასკის ეს ხუმრობა ეხმიანება მსოფლიოში ცნობილი ამ გაზიანი სასმლის თავდაპირველ რეცეპტს: ცნობილია, რომ 1886 წელს, როცა კოკა-კოლა პირველად შეიქმნა, მაშინ აშშ-ში კოკაინი აკრძალული არ იყო და პირვანდელ რეცეპტში ამ ნივთიერებასაც იყენებდნენ. მხოლოდ 1900-იანებიდან ამოიღეს კოკაინი კოკა-კოლას ინგრედიენტებიდან.

მხოლოდ ეს არ არის: ილონ მასკი ტვიტერის მომხმარებლების იმ ხუმრობასაც გამოეხმაურა, რომ იქნებ McDonald's-იც იყიდოს და ნაყინის გაფუჭებული აპარატები შეაკეთოს.

"მისმინეთ, მთლად სასწაულების მოხდენაც არ შემიძლია" — დაწერა ტვიტერზე.

რაც შეეხება კოკა-კოლას, თუ ილონ მასკი სერიოზულად იფიქრებს მის შეძენაზე, ამის მიღწევა, წესით, უფრო გაუჭირდება: კოკა-კოლას საბაზრო ღირებულება $284 მილიარდია, მსოფლიოში ყველაზე მდიდარ ადამიანად აღიარებული ილონ მასკის ქონება კი ამჟამად $253 მილიარდს ითვლის.

მიუხედავად ამისა, მისთვის ამ ხუმრობის ასრულება შეუძლებლად მაინც არ უნდა მივიჩნიოთ, თუ გავითვალისწინებთ იმას, რომ ტვიტერის შეძენაზე 2017 წელს იხუმრა და ხუთი წლის შემდეგ ასე სერიოზულობამდე მივიდა საქმე.

ილონ მასკი, რომელიც საკუთარ თავს "თავისუფალი სიტყვის აბსოლუტისტს" უწოდებს, ტვიტერს ცენზურის გამო ხშირად აკრიტიკებდა, რომლითაც ამ პლატფორმაზე სიძულვილის შემცველი მასალა იზღუდება.

მასკი აცხადებს, რომ მის მფლობელობაში ტვიტერი უფრო "სახალისო" გახდება და კანონის ფარგლებში მაქსიმალურად იქნება დაცული სიტყვის თავისუფლება.

ბევრი ამ ფაქტს საშიშროებად აფასებს, ვიღაცები კი კრიტიკას იუმორით გამოხატავენ: მაგალითად, ერთ-ერთმა მომხმარებელმა დაწერა

"ილონ მასკი $43 მილიარდს ხარჯავს, რომ ტვიტერზე ვეღარ დაამცირონ, როცა შეეძლო, უბრალოდ ნაკლებად გამაღიზიანებელი ყოფილიყო".

ამ საკითხთან დაკავშირებით მასკის პოზიცია კი ასეთია:

"იმედი მაქვს, ჩემი ყველაზე საშინელი კრიტიკაც კი დარჩება ტვიტერზე, რადგან სწორედ ამას ნიშნავს სიტყვის თავისუფლება".