ბენედიქტ კამბერბეჩმა Sky News-თან ინტერვიუში განაცხადა, რომ უკრაინელ ოჯახს ელოდება, რომელიც მის სახლში იცხოვრებს. მსახიობმა ამ ამბის შესახებ მისი ფილმის, სახელად Dr Strange In The Multiverse Of Madness-ის, პრემიერაზე ისაუბრა.

"მათ უკრაინის ტერიტორია უკვე დატოვეს და გადაადგილების პროცესს ყოველდღიურად ვაკვირდები. მე მინდა, რომ ამ ოჯახს უსაფრთხოებისა და სტაბილურობის შეგრძნება დავუბრუნო, რომელიც ამ არეულობის შედეგად დაკარგა. ეს ყველაფერი კი ჩემს სახლში ელოდებათ", — ამბობს ბენედიქტ კამბერბეჩი.

ფოტო: Getty Images

მსახიობმა ისიც თქვა, რომ ის ფინანსურად სხვა უკრაინელ ოჯახებსაც ეხმარება, რომლებიც თავიანთი სამშობლოდან საცხოვრებლად ბრიტანეთში გადავიდნენ. "მე იმ უკრაინელებსაც ვეხმარები, რომლებსაც ბრიტანეთში სურთ ცხოვრება, ეს კი დიდ ხარჯებს უკავშირდება. ასე რომ, რამდენიმე ოჯახს ფინანსურადაც დავეხმარე", — დასძინა მსახიობმა.

ეს პირველი შემთხვევა არაა, როცა ბენედიქტმა უკრაინას მხარდაჭერა ღიად გამოუცხადა. ცოტა ხნის წინ ბრიტანული კინოდაჯილდოება BAFTA-ს წითელ ხალიჩაზე გამოჩენილ ბენედიქტს უკრაინის დროშის გულსაბნევი ეკეთა და ადამიანებს მოუწოდა, რომ უკრაინელებს დახმარებოდნენ.

"ჩვენ გულსაბნევის ტარებაზე მეტი უნდა გავაკეთოთ. ფული უნდა გადავრიცხოთ, პოლიტიკოსები ვაიძულოთ, რომ დაზარალებული ადამიანების თავშესაფრით უზრუნველყოფა გააგრძელონ. ყველამ ის უნდა გავაკეთოთ, რაც შეგვიძლია. უამრავმა მოხალისემ გამოთქვა [უკრაინელი ლტოლვილების] მასპინძლობის სურვილი და იმედი მაქვს, მათ შორის მეც ვიქნები", — განაცხადა ბენედიქტმა.

ასევე იხილეთ: