ტელეკომპანია მაესტროს წამყვანი, გიორგი ისაკაძე თანამდებობიდან გაათავისუფლეს. ამის შესახებ გადაწყვეტილება ტელეკომპანიის დირექტორმა, ზურაბ ნაყეურმა მიიღო.

როგორც ნაყეურმა განმარტა, აღნიშნული გადაწყვეტილების მიღება ისაკაძის საავტორო გადაცემების ე.წ. აუთსორსზე გასვლის მოთხოვნამ განაპირობა:

"მე, როგორც ტელეკომპანიის დირექტორი ვიღებ გადაწყვეტილებას: მიმდინარე წლის 1 ივნისიდან შპს სტუდია მაესტრო ცალმხრივად წყვეტს 2014 წლის 10 ივლისს ჩვენ შორის გაფორმებულ შრომითი ხელშეკრულების მოქმედებას. უთანხმოების შემთხვევაში თქვენ გაქვთ უფლება, მიმართოთ სასამართლოს და ასეთ შემთხვევაში საქართველოს კანონმდებლობით გათვალისწინებულ ყველა ღონისძიებას".

როგორც თავად ისაკაძე განმარტავს, დირექტორის აღნიშნული წერილი, რომელიც მან ელექტრონული ფოსტის საშუალებით მიიღო, სიურპრიზი არ ყოფილა, რადგან ის 30 მაისს ესაუბრა ნაყეურს, რომელმაც განუცხადა, რომ მაესტროს დამფუძნებელთა 80%-თან კონსულტაციის შედეგად გადაწყდა, რომ ისაკაძესთან, როგორ პროექტის ხელმძღვანელთან, საქმიანი ურთიერთობა აღარ სურდათ.

ისაკაძემ განმარტა, რომ მაესტროსთან ბოლო პერიოდში მიმოწერისას მას აკავშირებდა სამი თემა ფინანსებთან მიმართებაში:

"პირველი ეს გახლავთ ჩემი როგორც კრედიტორის თემა: როდესაც კომპანიას შეექმნა საშიშროება, რომ მას დაედებოდა ყადაღა, დამფუძნებლებთან შეთანხმებით შევეცადე ეს პრობლემა აღმომეფხვრა. პირადად ავიღე ოვერდრაფტი ერთ-ერთი კომერციული ბანკიდან და დავფიქსირდი კრედიტორად".

გარდა ამისა, ისაკაძე განმარტავს, რომ ფინანსებს უკავშირდება თემა რომელიც ეხება თანამშრომლებისთვის წლის ბოლოსთვის მაინც ხელფასების მატებას 20%-ით:

"მივიღე პასუხი, რომ ეს ვერ მოხდებოდა წელს და მას გაგებით მოვეკიდეთ. მიზეზი იყო ხელშეკრულება, რომელიც ფიქსირებულ ხელფასებს გულისხმობს და ცვლილება მასში ვერ შევიდოდა".

რაც შეეხება ე.წ. აუთსორსზე გასვლას, ისაკაძემ აღნიშნა, რომ ნაყეურმა ამ მოთხოვნაზე მას უარი უთხრა.

ასევე მან განმარტა, რომ მხოლოდ ზეპირი შეთანხმება არსებობდა იმასთან დაკავშირებით, რომ მისი სახელფასო ანაზღაურება გადაიხედებოდა, თუმცა კონტრაქტში არაფერი შეცვლილა:

"ამაზეც მივიღეთ პასუხი, რომ კომპანიას არ აქვს საშუალება, რომ სახელფასო გადახედვა მოხდეს. თუმცა, აღსანიშნავია, რომ კონტრაქტი, რომელიც მე მაქვს მაესტროსთან გაფორმებული არ ითვალისწინებს, რომ მე უნდა წამეყვანა გადაცემა".

მისი თქმით, საბოლოდ გათავისუფლების მიზეზი გამოდის ის, რომ არის ტოტალური სხვაობა მასა და მაესტროს დამფუძნებლების, ასევე გენერალურ დირექტორის ხედვებს შორის აუთსორსთან დაკავშირებით.

ისაკაძე ამ დრომდე გადაცემების - საქმიანი დილის, ბიზნესკონტაქტისა და ანალიტიკის პროექტების მენეჯერი და წამყვანი იყო.