"ხერსონი უკრაინაა", "დიდება უკრაინას" — ხერსონში მოქალაქეებმა ოკუპაციის წინააღმდეგ მშვიდობიანი აქცია გამართეს, სადაც უკრაინულ სიმღერებს მღეროდნენ. ოკუპანტებმა აქცია დაარბიეს, რის შედეგადაც რამდენიმე ადამიანი დაშავდა.

როგორც უკრაინული მედიები წერენ აქციის მონაწილეები ცრემლსადენი გაზით დაშალეს. უკრაინა 24-ის ინფორმაციით, დაშავდა 4 ადამიანი. მათი თქმით, ერთ-ერთმა მოქალაქემ ფეხის ღია მოტეხილობა მიიღო. მათ სამედიცინო დახმარება უკვე გაეწიათ.

ხერსონს ოკუპანტები აკონტროლებენ, მაგრამ არ წყდება საპროტესტო აქციები და გამოსვლები. მოსალოდნელ "რეფერენდუმზე" ინფორმაცია არაერთხელ გავრცელდა. 20 აპრილს ხერსონის სამხედრო ადმინისტრაციის ხელმძღვანელმა განაცხადა, რომ ოკუპანტები ფსევდორეფერენდუმს მაისის დასაწყისში გეგმავენ. მიუხედავად იმისა, რომ რეგიონს რუსი სამხედროები აკონტროლებენ, ადგილობრივები ანტიოკუპაციურ აქციებს ხშირად მართავენ.

ვოლოდიმირ ზელენსკიმ განაცხადა, რომ ხერსონის დამოუკიდებლობაზე რეფერენდუმის ჩატარების შემთხვევაში უკრაინა ყოველგვარი მოლაპარაკების პროცესს დატოვებს.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში