ქართული ოცნების დეპუტატი ბექა დავითულიანი გავრცელებულ ჩანაწერებთან დაკავშირებით ამბობს, რომ სკანდალებს არაფრისგან ქმნიან, ვიდეო კი დამონტაჟებულია.

"რაშიც სამართლებრივი შემცველობა დანაშაულის არ არის, რატომ უნდა არკვიოს ვინმემ ავთენტურობა? რატომ ვქმნით ასეთ ილუზიებს ამ დამონტაჟბული ვიდეოდან? თან ამდენი დრო გავიდა და რამე უკანონო ტვირთბრუნვის ფაქტი ვნახეთ, ვითომ რომ ადასტურებთ, რომ აქ რაღაც საშინელება ხდება? არა, ასე სკანდალებს ქმნიან არაფრიდან და უნდათ ამ სკანდალზე ააწყონ მერე იქიდან არახამიას განცხადება, თავხედური სრულიად, აქედან დამონტაჟებული ვიდეო და ვითომ სკანდალია შექმნილი იმიტომ, რომ ქვეყანაში რამე აირიოს", — ამბობს ის.

სესიაზე მან, ასევე, განაცხადა, რომ ჩანაწერს იმდენი წყვეტა აქვს, შეუძლებელია მასზე ზემოქმედების კვალი არ იყოს.

"რატომღაც ხდება ხოლმე ასე, რომ ოპოზიციის რადიკალური ფრთა წამოიწყებს კამპანიას, მერე ამ კამპანიის ფარგლებში ერთგვარი იმედგაცრუება ეწყებათ მათ მხარდამჭერებს, რადგან ვერავითარ მიზანს ვერ აღწევენ. მერე, ჰოი, საოცრებავ, საიდანღაც, ვითომ ხომ უკრაინის თემატიკას არ იყენებენ შიდა პოლიტიკური თემებისთვის და გულმხურვალე მხარდამჭერები არიან, უცებ აღმოჩნდება ხოლმე, რომ უკრაინიდან ვინმე მათი უტიფარი მეგობარი, არახამიას მსგავსი თავხედი რაღაც სანქციებზე დაიწყებს საუბარს, მაშინ, როდესაც საპარლამენტო დელეგაციის ვიზიტის შემდეგ ურთიერთობები, როგორც იქნა, დასტაბილურდა.

მერე აქედან გამოაგდებენ დამონტაჟბულ ვიდეოს, რომელზეც ოდნავ მაინც თუ ერკვევა ვიღაც ამ მიმართულებით, იმდენი წყვეტა აქვს, რომ შეუძლებელია მასზე არ იყოს ზემოქმედების კვალი. გამოაგდებენ ამ რაღაც სულელურ ვიდეოს, რომელზეც პირველი — არაფერ უკანონოზე საუბარი არ მიდის, სულ რომ დავუშვათ, რომ ავთენტურია. მეორე — შიგნით 10 მარტიაო ეწერა, საერთოდ აპრილში დაასანქცირეს ეს კაცი და მარტში, როდესაც მათი მტკიცებით, სულ რომ ავთენტური იყოს, ის კაცი ბრიტანეთის მიერ სანქცირებული არ იყო. ამის შემდეგ ამბობენ, რატომ არ იძიებთო?", — თქვა მან.

გუშინ, 25 აპრილს ინტერნეტში, სავარაუდოდ, ვლადიმირ ევტუშენკოვისა და ბიძინა ივანიშვილის საუბარი გავრცელდა. ევტუშენკოვი მილიარდერი ოლიგარქია, რომელსაც პუტინთან აფილირებულ პირად მიიჩნევენ, მას დასავლეთმა რუსეთის უკრაინაში შეჭრის შემდეგ, სანქციები დაუწესა. ჩანაწერში საუბარია ბიზნესგეგმებზე, რამაც გააჩინა მოსაზრება, რომ ოლიგარქები სანქციებისთვის გვერდის ავლას ცდილობენ.

გავრცელებული ჩანაწერების შემდეგ, უკრაინის უმაღლესი რადას ფრაქცია ხალხის მსახურის თავმჯდომარემ, დავით არახამიამა ევროკავშირსა და აშშ-ს მოუწოდა, ივანიშვილის მიმართ სანქციების დაწესება განიხილონ. მისი თქმით, "ქართველი ოლიგარქი ბიძინა ივანიშვილი მჭიდრო კავშირშია რუსეთის პოლიტიკურ ელიტასთან".

გაიგე მეტი:

• ლელო მოითხოვს, ღარიბაშვილმა გაასაჯაროვოს შეხვდა თუ არა კრემლთან დაახლოებულ პირს
• საზოგადოებისთვის ეს ყველაფერი არის ძალიან უინტერესო — მაჭარაშვილი გავრცელებულ ჩანაწერებზე