კრემლის მთავარი პროპაგანდისტი, Russia Today-ის რედაქტორი, მარგარიტა სიმონიანი საქართველოს მთავრობის პოზიციას კიდევ ერთხელ იწონებს. როგორც ის ტელეგრამზე წერს, ახლანდელი მთავრობა ამ სიტუაციაში "გასაოცრად ადეკვატურად იქცევა". სიმონიანი ერთ-ერთია იმ პირებს შორის, რომლებიც ევროკავშირმა დაასანქცირა.

"საქართველოს ახლანდელი მთავრობა ამ სიტუაციაში გასაოცრად ადეკვატურად იქცევა. სააკაშვილი, რომელმაც ჩვენს სამშვიდობოებს ესროლა, თვითონ დააპატიმრეს, სანქციებს მხარი არ დაუჭირეს, რიტორიკა უფრო მშვიდია, ვიდრე CSTO-ს ზოგიერთი წევრის. ხომ არ გავაუქმოთ მათთან საჰაერო კომუნიკაციის აკრძალვა? პასუხისმგებლიანი ჟესტის ნიშნად. ისინი ამას ძალიან ელიან", — წერს ის.

ასე ეხმაურება სიმონიანი ირაკლი კობახიძის განცხადებას უკრაინაში გენოციდის აღიარებაზე ნაციონალური მოძრაობის ინიციატივასთან დაკავშირებით. კობახიძემ თქვა, რომ მმართველი პარტია ენმ-ს არცერთ საგარეო პოლიტიკურ რეზოლუციას არ განიხილავს.

აქამდე სიმონიანმა პრემიერმინისტრის, ირაკლი ღარიბაშვილის განცხადება მოიწონა. მან ფეისბუქგვერდზე გააზიარა RT-ს დაწერილი ღარიბაშვილის ციტატა იმის შესახებ, რომ საქართველო არ აპირებს რუსეთს უკრაინისადმი აგრესიის გამო სანქციები დაუწესოს და დააწერა: "მეგობრებო, საქართველო გამოჯანმრთელდა".