"თუ მართალია, საუბარი რაზეა — ერთი მეგობარი მეორე მეგობარს გარკვეულ კონსულტაციაზე ურეკავს, ეს არის და ეს", — ასე გამოეხმაურა ქართული ოცნების დეპუტატი, ირაკლი ზარქუას სავარაუდოდ, ივანიშვილისა და რუსი ოლიგარქის საუბარს. მისი თქმით, რუსეთის სპეცსამსახურები უსმენენ თავიანთ ბიზნესმენებს და შემდეგ ეს ჩანაწერები, "რატომღაც ხვდება ოპოზიციურ არხებზე".

"ჯერ ერთი, ეს უკანონო ჩანაწერები როდის უნდა დასრულდეს? ფაქტი ერთია, რომ ესეიგი რუსეთის სპეცსამსახურები უსმენენ თავიანთ ბიზნესმენებს თუ გარკვეულ წრეებს და შემდეგ ეს ჩანაწერები, რატომღაც ხვდება ოპოზიციურ არხებზე. ამაზე ჩვენ ადრეც გამოვთქვით გარკვეული საფუძვლიანი ეჭვი, მაგრამ ახლა საბოლოოდ დადასტურდა. [...]

იქ რა ნაწილიც მოვისმინე, რამე ტრაგიკული არ... თუ ეს მართალია და არ არის დამონტაჟებული. საუბარი რაზეა — ერთი მეგობარი მეორე მეგობარს გარკვეულ კონსულტაციაზე ურეკავს, ეს არის და ეს", — ამბობს ზარქუა.

გუშინ, 25 აპრილს ინტერნეტში, სავარაუდოდ, ვლადიმირ ევტუშენკოვისა და ბიძინა ივანიშვილის საუბარი გავრცელდა. ევტუშენკოვი მილიარდერი ოლიგარქია, რომელსაც პუტინთან აფილირებულ პირად მიიჩნევენ, მას დასავლეთმა რუსეთის უკრაინაში შეჭრის შემდეგ, სანქციები დაუწესა. ჩანაწერში საუბარია ბიზნესგეგმებზე, რამაც გააჩინა მოსაზრება, რომ ოლიგარქები სანქციებისთვის გვერდის ავლას ცდილობენ.

გავრცელებული ჩანაწერების შემდეგ, უკრაინის უმაღლესი რადას ფრაქცია ხალხის მსახურის თავმჯდომარემ, დავით არახამიამა ევროკავშირსა და აშშ-ს მოუწოდა, ივანიშვილის მიმართ სანქციების დაწესება განიხილონ. მისი თქმით, "ქართველი ოლიგარქი ბიძინა ივანიშვილი მჭიდრო კავშირშია რუსეთის პოლიტიკურ ელიტასთან".

გაიგე მეტი: