სპეციალური პენიტენციური სამსახური განცხადებით, ყოფილი პრეზიდენტის, მიხეილ სააკაშვილის ჯანმრთელობის მდგომარეობის გაუარესებისა და არასათანადო სამედიცინო მომსახურებაზე ინფორმაცია უსაფუძვლოა. მათი თმით, სააკაშვილი 24-საათიანი მეთვალყურეობის ქვეშ იმყოფება.

უწყების ცნობით, დანიშნული აქვს და მიეწოდება შესაბამისი მედიკამენტური მკურნალობა, რაც ასახულია დაწესებულებაში არსებულ სამედიცინო ბარათში.

"უსაფუძვლოა და საზოგადოების შეცდომაში შეყვანის მცდელობას წარმოადგენს მედიასაშუალებებით გავრცელებული ინფორმაცია მსჯავრდებულ მ. სააკაშვილის ჯანმრთელობის მდგომარეობის გაუარესებისა და არასათანადო სამედიცინო მომსახურებასთან დაკავშირებით", — წერს პენიტენციური.

პენიტენციურში ამბობენ, რომ მიხეილ სააკაშვილი უარს აცხადებს რიგ კვლევებზე, მათ შორის, თავის ტვინის მაგნიტურ-რეზონანსულ ტომოგრაფიაზე, ნევროლოგის დანიშნულ მკურნალობაზე, ფსიქოთერაპიის კურსის ჩატარებაზე და რეკომენდებულ ფიზიკურ აქტივობაზე. მათივე მტკიცებით, სააკაშვილს ეძლევა სუფთა ჰაერზე სეირნობის უფლება, რაზეც ის უარს ამბობს.

"მსჯავრდებულს პენიტენციურ სისტემაში ყოფნის პერიოდში ჩატარებული აქვს მრავალი კლინიკო-ლაბორატორიული და ინსტრუმენტული გამოკვლევები, მათ შორის, მიმდინარე წლის 06 მარტს მ.სააკაშვილს არსებული რესპირატორული სიმპტომების გამო ჩაუტარდა PCR ტესტირება, თუმცა კორონავირუსი არ დაუდასტურდა.

საზოგადოების შეცდომაში შეყვანის მცდელობას წარმოადგენს გავრცელებული ინფორმაცია, რომ სამსახური არ გასცემს მსჯავრდებულ მ. სააკაშვილის სამედიცინო დოკუმენტაციას. განვმარტავთ, იგი არაერთხელ იყო გამოთხოვილი, როგორც მისი უფლებადამცველების, ასევე, რამდენიმე ორგანიზაციის მიერ, რასაც მათ მიერ მომზადებული სხვადასხვა დასკვნაც ადასტურებს. ინფორმაციისთვის, მიმდინარე წლის 29 მარტს, მ. სააკაშვილის უფლებადამცველის მოთხოვნის საფუძველზე, გაიცა შესაბამისი სამედიცინო დოკუმენტაცია. ასევე, მზადების პროცესშია გამოთხოვილი სამედიცინო დოკუმენტაციის ასლები, რაც გაიგზავნება კანონით განსაზღვრულ ვადაში", — ვკითხულობთ განცხადებაში.

სააკაშვილი 20 აპრილს სასამართლო პროცესზე შეუძლოდ გახდა და ექიმის დახმარება ითხოვა. მან მანდატურებს დახმარება სთხოვა, რის შემდეგაც დარბაზიდან გაიყვანეს.

დღეს, 22 აპრილს უკრაინის სახალხო დამცველმა, ლიუდმილა დენისოვამ საერთაშორისო თანამეგობრობას მიხეილ სააკაშვილის უფლებების დარღვევაზე რეაგირებისკენ მოუწოდა. მის თქმით, რომ სააკაშვილს, ფაქტობრივად, არ შეუძლია ჭამა. შესაბამისად, ის გრძნობს მუდმივ სისუსტეს და არ შეუძლია ძილი.