ტეილორ სვიფტს შეუძლია თავის რეგალიებს ახალი და უცნაური მიღწევაც შემატოს — აპალაჩებში აღმოჩენილ ფეხსახსრიანთა ახალ სახეობას სახელი სწორედ მომღერლის პატივსაცემად დაარქვეს. ინფორმაციას ამის შესახებ სამეცნიერო გამოცემა Phys.org ავრცელებს.

Nannaria swiftae, იგივე მოღუნულბრჭყალიანი ორწყვილფეხიანი სვიფტი, ერთ-ერთია იმ 16 სახეობიდან, რომელსაც სახელი ვირჯინიელმა მეცნიერებმა, დერეკ ჰენენმა, ჯექსონ მინსმა და პოლ მარეკმა უწოდეს. ალბათ გასაკვირი არაა, რომ ერთ-ერთ მათგანი და კვლევითი პროექტის ხელმძღვანელი, ჰენენი, ტეილორ სვიფტის ფანია.

"მისი მუსიკა დამეხმარა, რომ სკოლაში სირთულეები გადამელახა, ამიტომ ახალაღმოჩენილი ფეხსახსრიანი სახეობისთვის სახელის მის პატივსაცემად დარქმევა ერთგვარი სამადლობელია ჩემი მხრიდან", — ამბობს ენტომოლოგი.

იმის მიუხედავად, რომ ორწყვილფეხიანი ცხოველები ბუნებაში ლპობის პროცესში დიდ როლს ასრულებენ, მათი პოვნა და ამოცნობა არცთუ ადვილია, რადგან დიდ დროს ატარებენ მიწაში და ნაკლებს — მიწის ზემოთ. ჰენენის ხელმძღვანელობით ნაპოვნი ახალი სახეობა ჯერჯერობით მხოლოდ ტენესის შტატშია აღმოჩენილი.

სხვათა შორის, მეცნიერმა ფეხსახსრიანთა კიდევ ერთ ახალაღმოჩენილ სახეობას სახელი თავისი ცოლის პატივსაცემად უწოდა და Nannaria marianae დაარქვა.