უკრაინული მედიის ინფორმაციით, ოკუპანტი ქვეყნის პრეზიდენტმა, ვლადიმერ პუტინმა ბუჩაში დანაშაულებში ბრალდებულ 64-ე მოტომსროლელ ბრიგადას "საპატიო" წოდება გვარდიელი მიანიჭა.

კრემლის ოფიციალურ ვებგვერდზე გამოქვეყნებულია პუტინის ხელმოწერილი ბრძანება, სადაც წერია, რომ ბრიგადას წოდება მისი წევრების "მასობრივი გმირობისა და ვაჟკაცობისთვის, გამძლეობისა და გამბედაობისთვის" ერგოთ.

მანამდე, პრეზიდენტის ადმინისტრაციის უფროსმა მრჩეველმა, ალექსეი არესტოვიჩმა გამოაქვეყნა იმ დანაყოფების სია, რომლებიც ბუჩაში, ირპენსა და გოსტომელში იბრძოდნენ. მათ შორის, 64-ე ბრიგადაცა ნახსენები.

კიევის ოლქი რუსი ოკუპანტებისგან 2 აპრილს გათავისუფლდა. ირპენმა, ბუჩამ, გოსტომელმა და სხვა ქალაქებმა, სადაც უკრაინის ჯარები შევიდნენ, მსოფლიოს ხელახალი გამოღვიძება აიძულა.

მედიაში გავრცელდა ფოტოები ბუჩას ქუჩებიდან, რომელიც სავსე იყო ცხედრებით — მათ ნაწილს ხელები ჰქონდათ შეკრული, ნაწილის გვერდით ველოსიპედები ეყარა, ნაწილი კი, მინიმუმ, სამი კვირის წინ მაინც იყო მოკლული.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში