ალ-აკსას მეჩეთთან ისრაელის პოლიციასა და პალესტინელებს შორის დაპირისპირება იყო, რის შედეგადაც, სულ მცირე, 152 ადამიანი დაშავდა. მათ დაზიანებების დიდი ნაწილი მიყენებული აქვთ რეზინის ტყვიებით, ყუმბარებითა და სამართალდამცველების ხელკეტებით. ინფორმაციას Reuters ავრცელებს.

პალესტინის საგარეო საქმეთა სამინისტრომ სრული პასუხისმგებლობას ისრაელს დააკისრა. ისრაელის პრემიერი კი ამბობს, რომ მუშაობენ სიმშვიდის აღსადგენად, როგორც წმინდა ტაძრის მთაზე, ასევე მთელ ისრაელში. მისივე თქმით, მზად არიან ნებისმიერი სცენარისთვის.

სოციალურ ქსელში დაპირისპირების ამსახველ ვიდეოკადრებში ჩანს, თუ როგორ ურტყამენ ხელკეტებს პოლიციელები მეჩეთში მყოფ მოსახლეობას.

როგორც Euronews წერს, ისრაელის უშიშროების ძალები მზადყოფნაში იმყოფებოდნენ, რადგან ბოლო ორი კვირის განმავლობაში ქუჩებში სასიკვდილო თავდასხმების სერიები იყო. მათივე ინფორმაციით, მარტიდან ისრაელის ჯარებმა მოკლეს 29 პალესტინელი, დასავლეთ სანაპიროზე რეიდების დროს, მას შემდეგ რაც პალესტინელმა თავდამსხმელებმა ისრაელის ქალაქებში 14 ადამიანი მოკლეს.