კათოლიკე აქტივისტების ჯგუფმა პეტიცია შექმნა, რომლითაც ლესბოსელ მონაზონზე გადაღებული ფილმის ბელფასტში წითელ პარასკევს დაგეგმილი პრემიერის გაუქმებას ითხოვენ.

რეჟისორ პოლ ვერჰოვენის ფილმი Benedetta მე-17 საუკუნეში მცხოვრები მონაზვნის, ბენედეტა კარლინის ნამდვილ ისტორიას ეფუძნება. კინოსურათის პრემიერა ჩრდილოეთ ირლანდიაში 15 აპრილსაა დაგეგმილი — იმ დღეს, როცა კათოლიკური სამყარო წითელ პარასკევს აღნიშნავს.

"ეს ფილმი არის სიცრუე და აშკარა თავდასხმა კათოლიკურ რწმენაზე", — აცხადებს დემიენ მერფი, ორგანიზაციის "ირლანდიური საზოგადოება ქრისტიანული ცივილიზაციისთვის" წარმომადგენელი.

მერფის თქმით, კინოსურათის გამოშვება წითელ პარასკევს "მიზანმიმართული შეურაცხყოფაა ყველა ქრისტიანისადმი".

"სირცხვილი ბელფასტის კინოთეატრს, რომ მათ ნებას რთავს, ეს ფილმი ნებისმიერ დროს აჩვენონ, მით უმეტეს, ამ განსაკუთრებულ რელიგიურ თარიღზე", — ამბობს იგი.

პეტიციაში, რომელიც ფილმის პროდიუსერებს და მის გამავრცელებელ კომპანიებს მიემართებათ, ასევე აღნიშნულია, რომ Benedetta-ში ნაჩვენები "მკრეხელური სცენები ღმერთს და მსოფლიოში მცხოვრებ უთვალავ კათოლიკეს შეურაცხყოფს".

"მკრეხელურში" სექსის სცენები იგულისხმება, თუმცა, ასეთი შეფასება რეჟისორისთვის გაუგებარია.

"არ მესმის, როგორ შეიძლება მკრეხელობა ჩაიდინო იმის შესახებ, რაც რეალურად მოხდა, თუნდაც 1625 წელს", — ამბობს ვერჰოვენი, — "ისტორიას ვერ შეცვლი და ვერც იმას, რაც მოხდა. მე კი ეს ფილმი იმ ამბავზე დავაფუძნე, რაც რეალურად მოხდა. ამიტომ, მიმაჩნია, რომ სიტყვა 'მკრეხელობის' გამოყენება ამ შემთხვევაში სისულელეა".