მას შემდეგ, რაც პრემიერმინისტრმა, ირაკლი ღარიბაშვილმა თქვა, რომ "Covid-19 თითქმის დამარცხებულია", იაშვილის სახელობის ბავშვთა ცენტრალური საავადმყოფოს სამედიცინო დირექტორი, ივანე ჩხაიძე ამბობს, რომ პანდემიის დასასრულზე საუბარი, ჯერჯერობით, ადრეა.

ჩხაიძე აღნიშნავს, რომ მიუხედავად კორონავირუსის დადასტურებული შემთხვევებისა და საავადმყოფოებში მიმართვიანობის კლებისა, 1 დღის განმავლობაში 300 ინფიცირებული და გარდაცვალების 6 შემთხვევა მაღალია.

"აქედან გამომდინარე, საუბარი იმაზე, რომ პანდემია ან დასრულდა, ან დასასრულს უახლოვდება, ჯერჯერობით ადრეა. მანამ, სანამ ჩვენ ასეთი რაოდენობის ინფიცირებული გვყავს და გარდაცვალებულთა რაოდენობაც, ასევე, სტაბილურად არ მცირდება, უნდა ვთქვათ, რომ ჯერ პანდემიის დასრულებამდე შორს არის. მითუმეტეს არ შეიძლება პანდემიის დასრულებაზე საუბარი, მანამ, სანამ ჩვენ არ ვიქნებით დარწმუნებული, რომ კორონავირუსის ახალი მუტაციის გამოჩენის ალბათობა არ არსებობს. ჯერჯერობით ჯანმო არ ადასტურებს ამ ფაქტს", — აცხადებს ის.

ჩხაიძე დასძენს, რომ ქვეყანაში ამ მხრივ, ვითარება ნამდვილად გაუმჯობესებული და დასტაბილურებულია, თუმცა, სანამ მსოფლიოს სხვა ქვეყნებშიც არ იქნება ასეთივე მდგომარეობა, გლობალურად, პანდემიის დასასრულზე საუბარი ადრეა.

"Covid-19-ის დამარცხებაზე" ღარიბაშვილმა გუშინ, 11 აპრილს ისაუბრა. 7 აპრილს დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ თქვა, რომ "თუ რაღაც ექსტრაორდინარული არ მოხდა ვირუსის ბიოლოგიაში, ევოლუციაში, მაშინ წელს, დიდი ალბათობით, WHO დასრულებულად გამოაცხადებს".

12 აპრილის მონაცემებით, საქართველოში კორონავირუსის 392 ახალი შემთხვევა დადასტურდა, გამოჯანმრთელდა — 131, ხოლო გარდაიცვალა 2 ადამიანი.